Awaji ore ubọọn̄ otutuuk ebi linyọn̄
96
Ìkọt aya okwa eyi kperarak ìkọt ìnyi Okumugwem;enyi, otutuuk ebi linyọn̄, ìkọt okwa ìnyi Okumugwem!
2 Ìkọt okwa ìnyi Okumugwem,
mè ìtọn̄ erieen̄ kan̄;
me usen me usen, ìkilook etip unyan̄a kan̄ îkinyan̄a ene!
3 Ìkpa umin kan̄ ìkana ìnyi ebi ido geelek;
ìkpa si uyeke ikwaan̄ kan̄ ìnyi otutuuk ebilene!
4 Okumugwem îmin enenen,
mè igbe ogwu ebetọn̄ enenen;
ọmọ ogbe ibe etet ukpook me lek
igak otutuuk ofifi awaji geelek.
5 Mije, otutuuk awaji ebi ofifi ido geelek ìre mkpọmfaka;
ire, Okumugwem, ọmọ orom akpabin inyọn̄.
6 Òrirọ mè umin ubọọn̄ ìkakana ọmọ okokop;
unye mè ujamgbugbo ìjojot me Uwu Mbuban kan̄.
7 Enyi otutuuk ebi linyọn̄, ìnyi Okumugwem umin;
ìtumu ìnyi Okumugwem ibe ke unye ìre eyi kan̄.
8 Ìnyi Okumugwem umin ògbegbe erieen̄ kan̄;
ìben akpan ngwugwa ìsa ìnu me oyet egep kan̄.
9 Ìtọbọ ebum ìnyi Okumugwem,
ogwu òkaan̄ òrirọ me lek, mè ikup mbuban;
otutuuk ebi linyọn̄, ìtet ukpook me isi kan̄.
10 Ìtumu ìnyi ebi ido geelek ibe ke Okumugwem ìre ubọọn̄;
ọmọ îsun̄ linyọn̄ ikam me irek;
kpunu ogwu òbokọt isisik linyọn̄ isan̄a me akpat;
Okumugwem môfieek oyerebet ònenen
inyi ebi ene.
11 Eya orọ, akpabin inyọn̄, bele ejit;
linyọn̄, owu nwọọn̄ unwọọn̄;
okwaan̄, owu si,
melek inu geelek òkup me emen kwun̄,
bele ejit, mè gbugbut.
12 Ijọn̄ uko, owu si,
mè inu geelek òkup me emen kwun̄,
bele ejit;
enyi otutuuk uti òkup me oron, ìkọt okwa ìnwọọn̄ unwọọn̄.
13 Ìnwọọn̄ unwọọn̄ me isi Okumugwem;
mije ọmọ òkinu;
iin̄, òkinu inenisibi oyerebet inyi ebi linyọn̄;
môsibi oyerebet ònenen inyi ebi linyọn̄,
mè ifieek oyerebet atikọ inyi ebilene.