Itọtọbọ ebum mè isisiki ibot inyi Awaji
95
Ìna mè eji ekọt okwa etọn̄ Okumugwem,mè eji ekọt okwa unwọọn̄ enyi Awaji
ogwu òre ewuuk òkinyan̄a eji!
2 Ìna mè eji enu me isi kan̄ enenyi ọmọ itọn̄,
mè etaan̄ ukpo ekọt okwa unwọọn̄ esa etọn̄ ọmọ!
3 Mije Okumugwem ìre ikpele Awaji;
ọmọ ore ikpele ubọọn̄ òkikpulu asabọn awaji geelek.
4 Otutuuk linyọn̄, ìre eyi kan̄;
bene me ere òdọdọk ichit
si re òta ibot ogoon̄ òbebene ichit;
îre ọmọ okaan̄.
5 Okwaan̄ ìre eyi kan̄, mije îre ọmọ orom;
nchat ijọn̄ si ìre eyi kan̄, mije îre ọmọ osan̄a isibi.
6 Ìna mè eji etọbọ ibot, mè erọn̄ ere ijọn̄ enyi ọmọ;
ìna mè eji egwook ekpe me isi Okumugwem
ogwu òrorom eji!
7 Mije ọmọ ìre Awaji kiji;
eji ìre ebi ọmọ okikpọ chieen̄ me lek,
mè ire ebi ọmọ okikpukpo kubọk urum arọọn̄.
Awaji ìbe,
“Chereyi, ire enyi inọ ida n̄a,
8 ikayaka ìnye ejit kubọk enyi erọbe me Meriba,
mè ubọk enyi erọbe me usen ya me Masa me emen èwê,
9 mgbọ ebi nte kinyi etọbe emi ikpọ,
iberak emi ukot isan̄a me ijọn̄,
ubọk geelek ema emun̄be ikwaan̄ nrọbe inyi ema.
10 Akọp acha ini ke njọ ejit me lek kiban̄ ebi ukot keya,
mè itumu ibe ke ema ìre ebi ejit ìkakikup me ere ge;
ema mîjit irọrọ inu mbe ema erọ.
11 Eya ke nsa me unaan̄-ejit inyan̄a ibot ibe,
ke ema kpekakaan̄ mgbọ
ininin̄ inyọn̄ ijọn̄ nsun̄be inyi ema
ibe ema enin̄ esiki efuuk.”