Awaji ore ogwu òkisibi oyerebet me ibot otutuuk ene
94
Jei Okumugwem, owu ore Awaji ogwu òkisan̄a useen̄;owu Awaji ogwu òkisan̄a useen̄,
jeen̄ unaan̄-ejit kwun̄!
2 Owu ogwu òkisibi oyerebet me ibot otutuuk ebi linyọn̄;
tọbọ jibi na nyi ebi ugumulek inu ògbegbe ema!
3 Jei Okumugwem, ìre kpa mgbọ
ke ebi òkpaka ibot ebebele ejit ire ni?
Tumu-nu,
ìre kpa mgbọ?
4 Ebi òkpaka ibot ekitumu ikọ unyechieen̄,
mè ikisa ugumulek kiban̄ inyan isi,
mè ikigugo lek.
5 Okumugwem, ema ekisisaak ebi eyi kwun̄,
mè ikitutuku ebi owu okaan̄be.
6 Ema ekikpan̄ ebi nwakpa mè ebi ichen ìgọgọọk eji iluk,
mè èkpan̄ si bọn kpà-nte.
7 Ema ekibe, “Okumugwem ìkamun̄ eji;
Awaji ebi Ijeren ìkarọriọọn̄ inu eji ekirọ.”
8 Enyi ebi ikpak, ìkigobo inu ìtet;
enyi ebi burubut,
ìre mgbọ owa ke enyi eberiọọn̄ inu?
9 Awaji ogwu òrorom utọn̄, ìre ìkpokinọ ikọ ni?
Ogwu òrorom chieen̄, ìre ìkpokimọọn̄ inu ni?
10 Ìre ogwu òkigana ikọ inyi ido geelek me linyọn̄
kpokọt isulu enyi osusut?
Ìre ogwu òkijeen̄ ene ifuk-ibot
kpokaan̄ ifuk-ibot eyi kan̄ ni?
11 Okumugwem îriọọn̄ ekiket ebilene;
îriọọn̄ ibe ke inu geelek ema ekikeek ìre inu ikike.
12 Jei Okumugwem, uga ubelejit òwa
inyi ene ya ogwu owu okiteme nteme;
owu òkisa me ikan kwun̄ ijeen̄ ọmọ inu.
13 Owu môkisun̄ ọmọ me utelelek
mgbọ ebi òkpaka ibot ekinyi ọmọ ufialek,
mege ire mgbọ owu môtapbe
ebi ikpak cha ibot me udọn̄.
14 Mije, Okumugwem ìkposan̄a ebi eyi kan̄ ubọk me lek;
ìkpojit ebi îgobobe inyi lek kan̄.
15 Ata oyerebet môgwu ikom inin̄ me uwu oyerebet;
otutuuk ebi ata irọrọ mêgọọk irọ unen oyerebet inye.
16 Ìre ekene obogọọk emi ikeke itim akọn̄
me lek ebi òkpaka ibot?
Sà ìre ekene obotumu ikọ ibot n̄a
me isi ebi ijo irọrọ?
17 Mebe Okumugwem ìkatap ubọk ìnyi emi,
kè nra ikwu iraka.
18 Jei Okumugwem, mgbọ nkikeek ibe ke mânikwaak irọn̄,
owu otet emi ikaan̄,
bak me lek ke òkimumun̄ emi me chieen̄ mgbọ geelek.
19 Mgbọ uga saasaak isinin̄ emi me emen,
ukarajit okinyi emi okisiki emi ejit.
20 Ìre owu môkọt ire unene
ebi ìkisibi oyerebet bukubuku;
ebi ìkigwen inu ikarege ikan ibe ire ikan?
21 Ema ekinin̄ oru ikeme ebi ata irọrọ,
mè ikitip ebi ekalọge inu geege oyerebet mkpa.
22 Ire, Okumugwem ore uwu mgban akọn̄ òkikput emi lek,
Awaji n̄a ore ewuuk òkilet emi lek.
23 Ọmọ môyaka ijo inu kiban̄ ikwuun̄ ema me ibot,
mè igen̄ ema isan̄a, bak me lek inu ikpak ema ekirọ;
Okumugwem Awaji kiji môgen̄ ema isan̄a kpai.