Awaji ore ogwu mkpulu òmimin ichit
97
Okumugwem ore ubọọn̄;otutuuk ebi linyọn̄ ìnwọọn̄ unwọọn̄;
otutuuk ebi ìluk me lek
ogbogbo achọ òkup esese esese, ìbele ejit!
2 Oduku inyọn̄ mè udun okana ọmọ ichit bùk;
ata irọrọ mè unen oyerebet ke îsa itọbọ ọdọ mkpulu kan̄.
3 Ukan̄ okije me isi kan̄,
mè ikiwọp ebi ochicha ìkana ọmọ okokop ikpan̄.
4 Omumen-inyọn̄ kan̄ okinyi utoon̄ me linyọn̄;
ebi linyọn̄ isimun̄, mîra ikiran.
5 Me isi Okumugwem, ogoon̄ îtọk ita
kubọk mgbe ukan̄ otetbe,
mgbọ Okumugwem ogwukaan̄ otutuuk linyọn̄ okinu.
6 Akpabin inyọn̄ okijeen̄ ata irọrọ kan̄;
otutuuk ebi linyọn̄ emumun̄ ujamgbugbo kan̄.
7 Ebi ìkiriaak mkpọmfaka, mè ikisa inu ekọkọ igugo lek,
esip îtet ema enenen;
otutuuk awaji geelek ekitọbọ ibot inyi owu Okumugwem.
8 Ebi Sayọn mîbele ejit,
ebi Juda mînwọọn̄ unwọọn̄,
mije, ema mînọ
ubọk Okumugwem osibibe oyerebet
inyi ebi linyọn̄.
9 Okumugwem, owu obene ichit
me oniin̄ geelek me otutuuk linyọn̄;
owu omin ichit me lek otutuuk awaji geelek
ebilene ekiriaak.
10 Enyi ebi ìmumun̄ Okumugwem me chieen̄, ìcha ijo inu;
ọmọ okibem ugwem ebi kan̄ ebi ìkirọ ata irọrọ;
ọmọ okinyan̄a ema me ubọk ebi òkpaka ibot.
11 Utoon̄ Awaji îsibi itoon̄ me lek ebi ata irọrọ,
mè isa ubelejit ijet ebi ìkirọ inu òtatat.
12 Enyi ebi ata irọrọ,
ìnwọọn̄ unwọọn̄ mije Okumugwem;
ikawuuk ibe ke ọmọ ìre ogwu òkup mbuban;
ìtọn̄ ọmọ bak me lek inu îrọbe!