Ogwu ubọọn̄ ogwu Okumugwem otọkọbe aran̄ me ibot
2
Keke orọ ido geelek okiririin̄?Ìre keke orọ ebilene ekitọt inu ikakaan̄ge ibot?
2 Ebi ubọọn̄ linyọn̄ mîneen̄ lek akọn̄ isun̄ isan̄a;
ebi ibot mkpulu mîgbaan̄ ibọp oru
ikeme Okumugwem,
mè ogwu ubọọn̄ îgobobe ito.
3 Ema ekitumu ibe,
“Eji enefieek enan̄a me irak mkpulu kiban̄,
mè ebum esibi me irak ubọk kiban̄,
mè eji gaalek ekekpulu lek kiji.”
4 Ire, Okumugwem môsiki
ikweek me emen inyọn̄
ikichak ema ifiin̄,
mè òkonwe nkwọọk onyi ema.
5 Okumugwem môsa me unaan̄-ejit igana ere inyi ema,
mè otap ema ukpook me lek.
6 Môtumu inyi ema ibe,
“Emi me lek n̄a nto ubọọn̄ me Sayọn,
ogoon̄ mbuban n̄a.”
7 Ogwu ubọọn̄ mônenitumu ibe,
“Mâtumu inu Okumugwem
otumube inyi emi ichili ibook;
Okumugwem ìtumu inyi emi ibe,
‘Owu ìre gwun̄ n̄a;
cherekeyi ke emi me lek n̄a nkana nte kwun̄.
8 Beek emi, ke mânyi owu ido geelek me ìrot;
otutuuk linyọn̄ môkana eyi kwun̄.
9 Ìbobet lek okwukwut ke osa itim ikpan̄ ema;
owu môkpukpuku ema
kubọk otin̄ ibat.’ ”
10 Eya orọ, enyi ebi ubọọn̄,
ìkaan̄ iriọọn̄-inu;
enyi ebi ibot mkpulu linyọn̄,
ìkween̄ inu ìnyi lek kinyi.
11 Ìsi ikwaan̄ Okumugwem me ukpook,
mè ìnwọọn̄ unwọọn̄ me isi kan̄ me irak ulibi.
12 Ìrọn̄ me ijọn̄ ìtet ukot ogwu îgobobe isa ito ubọọn̄,
inyi ikanaan̄ ejit;
inyi enyi ekakwaan̄ mkpa uwuuk-lek;
mije unaan̄-ejit kan̄ ìkinu gbei.
Ubelejit otutuuk ebi ìtap ibot me
irak Okumugwem ìkimin igak eke!