Itotoon̄ Awaji ejit me lek me inu òbosak ene ibot
Okwa kè Debit mgbọ îlibibe inwọnọ ogwu gwun̄ Abusolọm. Okwa.
3
Jei Okumugwem, kpọ-nuubọk ebi ochicha n̄a ewabe enenen!
Ebi ìkirọ ikeme emi ewawa igo!
2 Owuwa ene ekitumu ibe ke
kpukpunu ubọk Awaji obosa
inyan̄a ugwem n̄a isibi.a
3 Ire, jei Okumugwem,
owu ore agbọ òkikput emi lek;
owu okirọ emi imin,
mè ikirọ ejit n̄a inye.
4 Ntaan̄ ukpo igwen Okumugwem
ibe itap ubọk inyi emi;
ikukup me inyọn̄ ogoon̄ mbuban kan̄ ifọọk emi otu.
5 Emi me lek n̄a nyayaka lek imaan̄, mè ilaak inwọnọ,
mè iyaka ibolo chieen̄ me ewelegwe;
mije, Okumugwem ìbebem emi iwele egwe.
6 Ǹkafieek owot me lek obop obop ebi ochicha
ìgbagban ikana emi me ijọn̄ okokop.
7 Jei Okumugwem, nan̄a keke!
Jei Awaji n̄a, nyan̄a emi!
Owu otaak otutuuk ebi ochicha n̄a ada me agba uga;
owu ofaan̄ ejeek isan̄a
me otu ebi ìkikpaka ibot inyi owu.
8 Ubọk kwun̄ Okumugwem ke unyan̄a okinan̄a;
ebi eyi kwun̄ ke ugbana kwun̄ okup inyi.