Uriaak ikakwun̄
Nteme òkup inyi ogwu òjeen̄ okwa: Mêsa nkwukwak echi olik ikwak. Okwa kè Debit.
4
Nọ emi ida, mgbọ geelek nsigwen owu, jei Awaji,ogwu òkirọ emi nnwọn;
mgbọ nkupbe me emen ufialek,
owu onyan̄a emi isibi;
to emi nsan,
mè nọ uriaak n̄a.
2 Enyi bọn ebilene, enyi ebenwene umin n̄a
ikana itap me inu esip isi ire mgbọ owa?
Sà ìre enyi ebema inu ikike,
mè ilibi igọọk ofiaan̄ isi ire mgbọ owa?
3 Ìriọọn̄ ibe ke Okumugwem îgobo
ebi ìkimin ọmọ isun̄ inyi lek kan̄;
Okumugwem mônọ emi ida mgbọ nsigwen ọmọ.
4 Enyi mêkọt inaan̄ ejit,
ire, ikagọọk unaan̄-ejit mè ìrọ ijo inu;
enyi isilaak me inyọn̄ mkpilaak,
ìgen ibot ìkeek ikọ yi,
mè ìkup dii.
5 Ìgwa ngwugwa ògbegbe ìnyi Okumugwem,
mè ìtoon̄ ọmọ ejit me lek.
6 Owuwa ene ekibe,
ìre ekene obonirọ ata inu inyi ema ye;
jei Okumugwem, soso, rọ inu ije ijaan̄ eji me lek.
7 Ire, ubelejit otapbe emi me ejit îgak eyi ema ekaan̄be
mgbọ uko kiban̄ osibibe akpa mè aya miin̄ òwawa.
8 Mâyaka lek imaan̄, mè ilaak inwọnọ;
mije, îre owu Okumugwem gaalek
okikput emi unan me lek.