Uriaak ewelegwe
Nteme òkup inyi ogwu òjeen̄ okwa: Ebesa òja ikọt. Okwa kè Debit.
5
Gban̄ ikọ nkitumu, jei Okumugwem,mè nọ mfi nkito!
2 Nọ ida n̄a mgbọ nkito lek inyi owu,
jei ogwu Ubọọn̄ n̄a mè Awaji n̄a;
mije owu ke nkiriaak uriaak ikpọ isi.
3 Jei Okumugwem, owu mônọ ida n̄a me ewelegwe;
ewelegwe ke mbasa mbeek n̄a inito me isi kwun̄,
mè ikweek ikikpọ owu chieen̄.
4 Owu òkare Awaji inu ikpak okitop me lek;
ijo inu ìkabokup me ere owu okupbe.
5 Ebi ugumulek, owu òkposa chieen̄ irieen̄ me lek;
ebi ìkirọ ijo inu, owu òchacha.
6 Owu môjijaka ebi ataak,
mè igwen ebi ìkpan̄ ene mè ebi ofiaan̄ urieek.
7 Ire emi, mânin̄ inu me emen uwu kwun̄,
sa me imumechieen̄ okikaan̄ mgbọ geelek;
emi mâsa me ulibi
itọbọ ebum inyi owu me Uwu Mbuban kwun̄.
8 Okumugwem, mije ebi ochicha n̄a,
sa emi je me oniin̄ eyi kwun̄,
òrere oniin̄ eyi ata irọrọ;
rọ oniin̄ kwun̄ irọt inyi emi ǹgọọk.
9 Ikọ otu ebi ochicha n̄a ìkakikaan̄ ebon;
inu òkup ema me ejit ìre ifafiat ene;
emen ebek kiban̄ ìre udọn̄-ufuun̄ òbobook otu;
mkpa okup ema me emen ebek;
otu alọm kiban̄ ìre uchọk,
ìkileleke ene ifiin̄.
10 Jei Awaji, tip ema oyerebet;
yaka ijo otitọt kiban̄ kwaan̄ ema me ibot;
rieen̄ ema san̄a me isi kwun̄,
mije ogbogbo ijo inu ema erọbe,
bak me lek ema efieekbe inan̄a owu me lek.
11 Ire, tele inyi otutuuk ebi ìtoon̄ owu ejit me lek
enwọọn̄ unwọọn̄;
tele mè ema ekọt okwa ebele ejit mgbọ geelek.
Bem ebi ìmama owu;
inyi ebi ìmama erieen̄ kwun̄ enwọọn̄ unwọọn̄.
12 Okumugwem, owu okigbana ebi ata irọrọ,
mè ikisa nnwọn kwun̄ ikput ema lek kubọk uga agbọ.