Uriaak ibebeek Awaji ibe isibi unen oyerebet
Okwa ito kè Debit, eyi îkọtbe inyi Okumugwem bak me lek kè Kus ogwu Benjamin.
7
Jei Okumugwem, Awaji n̄a,ubọk kwun̄ ke ntap ibot;
taba emi sibi,
mè nyan̄a emi me ubọk
ebi ìkigọọk emi ibesak emi unan;
2 inyi ema ekachim emi kubọk egbe àtat,
mè ìdut emi ìsa ìsi ìgwak ìtaka,
me ere kpamun̄be ogwu òbonyan̄a emi.
3 Jei Okumugwem, Awaji n̄a,
ire nrọ inu yi etoon̄be emi,
mè ìre ǹrọrọ ene ilọ;
4 ire nleke ogwu une n̄a ifiin̄,
mè ìre ǹrọrọ ogwu ochicha n̄a inu ikpak me nnaan̄,
5 tele mè ebi ochicha egọọk emi,
mè esoon̄ emi etet;
tele mè ema ebọn̄ emi eto me ijọn̄,
mè ekpan̄ emi,
mè esa ata erieen̄ n̄a echọk me ijọn̄.
6 Ire, ire ìkare ikeya, jei Okumugwem, naan̄ ejit,
mè tọbọ jibi;
nan̄a keke,
na kwek unaan̄-ejit ebi ochicha òkiyok me lek n̄a;
soso nan̄a keke nin̄ emi lek;
na sibi unen oyerebet nyi emi.
7 Titiin̄ ebi ido geelek gban kana lek kwun̄,
mè nene ogboon̄ ubọọn̄ kwun̄ me emen inyọn̄ kweek irek
sibi ema oyerebet me ibot.
8 Owu, Okumugwem,
okisibi oyerebet me ibot otutuuk ebilene;
sibi emi oyerebet me ibot gọọk me lek unen eru n̄a,
mè ugwem òtatat eyi nkiluk.
9 Owu ìre Awaji òkirọ inu ònenen;
owu oriọọn̄ ejit kiji mè ekiket kiji;
kwek inu ikpak ebi ijo ife ekirọ;
ire, kpọ chieen̄ me lek ebi ata ife.
10 Awaji, ogwu òkinyan̄a ebi kpekaan̄ ofiaan̄ me ejit,
ọmọ ore agbọ òkikput emi lek.
11 Awaji ìre ogwu unen oyerebet;
ìkinaan̄ ejit usen geelek inyi ebi ijo irọrọ.
12 Ire ema kpenwene ugwem,
Awaji môwat oge akọn̄ kan̄ ireke;
îra inwun ogbaan̄ kan̄ isan̄a,
mè ibọp inen̄e isun̄ ikikpọ.
13 Îkpulu si nroon̄ akọn̄ òkikpan̄ ene ikwaan̄,
mè itet oraan̄ kan̄ ukan̄ okisak me lek
itat ikpọ ebi ìkigọọk emi.
14 Ìkpọ, ogwu òro ijo înin̄ owot ijo inu,
uman inu ikpak otetet,
imaman ofiaan̄.
15 Îrọkọ udọn̄,
mè inen̄e isun̄ iban ofifi ene;
ire, ọmọ gaalek oyaka inan̄a irọn̄ inin̄ emen udọn̄ kan̄.
16 Inu ikpak kan̄ ìbogwook ọmọ me ibot;
inu afa kan̄ ìboyaka itoon̄ si me eden̄ ibot kan̄ gaalek.
17 Ire emi, mâbe Okumugwem usọ,
mije, îrọ inu ònenen;
mâkọt okwa itọn̄ Okumugwem,
Ogwu Òbebene Ichit.