Umin Awaji mè irek îtobe ebilene
Okwa kè Debit. Okwa keyi ìnan̄a me ikpa okwa ogwu òjeen̄ okwa. Mêsa uneen̄ ebi Gat ikwak.
8
Jei Okumugwem, Òkaan̄ kiji,erieen̄ kwun̄ îkaan̄ umin ikana otutuuk linyọn̄.
Owu orọ inyi umin kwun̄ isibi utoon̄
me akpabin inyọn̄.
2 Ikerere asa nsabọn, mè ebi ìkup me otu ebe,
ema mêkitumu ikọ umin kwun̄;
ikọ otu kiban̄ îjeen̄ ebi ochicha kwun̄
mè ebi ìkije ikeme owu
ibe ke owu okaan̄ unye enenen;
mije keyi, kpunu ema ene geege
òbokọt ikeke ida owu.
3 Nsikimun̄ akpabin inyọn̄, inu ubọk kwun̄ orombe,
onyan̄ mè ntoronyan̄ osun̄be ikam me irek kiban̄,
îkikaan̄ emi ukpook;
nra ikikeek ibe,
4 ìre ebilene ikike ekup me lek keke mọnọ,
eyi owu okikpọ ema chieen̄ me lek ikeyi,
mè ikikaan̄ ata ekiket ibak ema?
5 Irek otobe ema îbene enenen;
sọntiik ke îsa isiki igak irek kwun̄;
owu onyi ema ikpele umin mè ulibi
kubọk ebi ubọọn̄.
6 Owu osa ema ito me ibot inu geelek orombe,
mè itap otutuuk inu chi geelek me irak ubọk kiban̄.
7 Bene me lek ebi kè arọọn̄ mè ebot,
mè eriembuuk mè anam oron geelek,
8 ire lek unọn òwulu me inyọn̄,
mè ebi kè irin̄ mè inu geelek òluk me emen okwaan̄.
9 Jei Okumugwem, Òkaan̄ kiji,
erieen̄ kwun̄ îkaan̄ umin ikana otutuuk linyọn̄.