Itọtọn̄ Awaji mije îdabe ebi ijo ife ito
Ìkup inyi ogwu òjeen̄ okwa: Igọọk me ida okwa mkpa gwun̄ enerieen̄. Okwa kè Debit.
9
Jei Okumugwem, mâtọn̄ owu me otutuuk ejit n̄a;mâtumu otutuuk uyeke uyeke inu owu orọbe isibi.
2 Mâbele ejit mè inwọọn̄ unwọọn̄ mije kwun̄;
mâkọt okwa itọn̄ owu, Awaji Ogwu Òbebene Ichit.
3 Ebi ochicha n̄a mîgwu ikom ililiin̄,
mè irurọn̄ọ ikwaan̄
mgbọ ema ebenebe chieen̄ itoon̄ owu me lek.
4 Owu okup me inyọn̄ ogboon̄ ubọọn̄ kwun̄
ikisibi oyerebet ònenen;
owu onyi emi unen n̄a,
mè ijeen̄ ibe ke ǹkarọ ìlọ.
5 Owu ogana ere inyi ebi ofifi ido geelek;
owu ojijaka ebi ìkirọ inu ikpak,
mè irọ erieen̄ kiban̄ ichep dìp dìp.
6 Owu ojijaka ebi ochicha kiji isan̄a ire mgbọ geelek,
mè igwak ama kiban̄, mkpukpọk ìkasik;
kpunu ogwu òboyaka ikeek ema ofifi.
7 Ire, Okumugwem ìkukup me lek ubọọn̄ ire mgbọ geelek;
îto ogboon̄ kan̄ itele inenisibi oyerebet.
8 Ìbosa me ata irọrọ ikikpulu linyọn̄,
mè ikisọp oyerebet ikakaan̄ge wọlọwọlọ inyi ebi ene.
9 Okumugwem môre mgban
ebi ekitutuku ekisa ikwek lek;
lek kan̄ ke ebekitap ibot mgbọ uyọrọlek.
10 Okumugwem, ebi ìrọriọọn̄ owu mêtoon̄ ejit me lek kwun̄,
mije òkakilap ebi ìnunu owu me lek ìsan̄a.
11 Ìkọt okwa ìtọn̄ Okumugwem ogwu òluk me Sayọn;
ìkpa inu îrọbe ìnyi ebi ido geelek enọ!
12 Mije Awaji îkeek ito ebi ekitutuku;
ọmọ ogwu òkido ibot ebi ekpan̄be,
ìkawuuk idodo ibot kiban̄.
13 Jei Okumugwem, kaan̄ ejit nsan me lek n̄a;
kpọ kwulukwulu ebi ochicha n̄a enyibe emi;
nyan̄a emi sibi me ubọk mkpa,
14 ufuna mâkeke me isi ebi Jeruselem
ikpa inu mbak me lek ikitọn̄ owu;
mâbele ejit mije owu onyan̄a emi isibi.
15 Ebi ido geelek mîrurọn̄ọ inin̄ udọn̄ ema erọkọbe;
ukot kiban̄ gaalek îjijeen̄ me otu ufe ema elileekbe itip.
16 Okumugwem îjeen̄ ogwu ọmọ orebe isibi
bak me lek unen oyerebet îfieekbe;
ikwaan̄ ebi ijo irọrọ erọbe
îseme itet ema gaalek kubọk ufe.
17 Ebi ìkpaka ibot inyi Awaji mêfon ama ekwukwu;
inu yaage si okup inyi ebi ido geelek ìwuwuuk Awaji.
18 Awaji ìkabowuuk ebi una ire mgbọ geelek;
ikpọchieen̄ ebi ugbọọn̄ ekaan̄be me lek kan̄
ìkabochep ire mgbọ geelek.
19 Jei Okumugwem, nan̄a keke;
kachieek ibe unye ebilene igak eyi kwun̄;
to ebi ido geelek me isi kwun̄,
mè sibi ema oyerebet me ibot.
20 Okumugwem, tap ema ukpook me lek;
rọ inyi ema eriọọn̄ ibe
ke ema ìre ukpọk ukpọk ebilene ikike.