Uriaak ibebeek Awaji ibe inyan̄a ene
10
Jei Okumugwem, keke orọ ojọn̄ọbe ere me lek kiji?Ìre owu môlet lek kwun̄ mgbọ eji ekupbe me uyọrọlek ni?
2 Ogwu òkpaka ibot inyi Awaji
môsa me ugumulek ililaba ebi ugbọọn̄;
Awaji môsasa ijo otitọt kan̄
ikana ikwuun̄ ọmọ me ibot.
3 Ogwu òkpaka ibot ìkigugo lek ijo inu òkilọk ọmọ irọrọ;
ìkitọn̄ ogwu ngan,
mè ikitumu ijo ikọ ibak Okumugwem.
4 Bak me lek ugumulek,
ogwu ijo irọrọ ìkakaan̄ nkeek ofolek Okumugwem;
ìmọnọ ibe ke Awaji ìkakup ọmọ me uyọt.
5 Mije inu kan̄ geelek okije ijaan̄,
ìmọnọ ibe oyerebet Awaji ìkpore ọmọ lek;
ire me lek ebi ochicha kan̄,
ìkinwenwe nkwọọk inyi otutuuk kiban̄.
6 Ìkitumu me ejit kan̄ ibe,
“Kpunu inu òbosisik emi;
uyọrọlek ìkabomun̄ emi mege inyọn̄ òta.”
7 Ogbo mè ofiaan̄ mè iririki ene ugwem ìjojot otu kan̄;
ijo inu mè iwot okup ọmọ me otu alọm.
8 Ìkilileek me emen ama ikpan̄ ebi kperọ ilọ;
mè ìkije enun̄unun̄ ikikpọ ebi ugbọọn̄.
9 Ìkituun̄ kubọk egbe àtat me emen udọn̄ kan̄;
mè olet òkokpọ ikpekpebe ebi ijo irek;
isitet ema me emen ufe kan̄,
îra itaba ema ije.
10 Ìkikọkọọk ebi îtetbe ikam,
mè òben ema òtọbọ me ijọn̄,
mè osa otutuuk unye kan̄ orọn̄ okeme ema.
11 Ọmọ ìmọnọ me ejit kan̄ ibe
ke Awaji ìkakpọ chieen̄ me lek inu ọmọ orọbe,
ke ìyayaka isi isan̄a,
ke ìkakaan̄ mgbọ imumun̄ ọmọ mgbọ geege.
12 Jei Okumugwem, nan̄a keke;
bene ubọk sulu ebi ikpak osusut;
kawuuk ebi irek kiban̄ osikibe!
13 Ìre me lek keke ni
ke ogwu ikpak okpọ Awaji isiki chieen̄,
mè imọnọ me ejit kan̄ ibe
ke Awaji ìkaborọ ọmọ inu geege?
14 Owu Awaji omun̄ inu òrọrọ,
mije owu òkakisan̄a chieen̄ me lek
ebi ekirọ ikeme me ikpak mè ijo unaan̄-ejit;
îre owu me lek kwun̄ okitap ada
me chieen̄ ebi ochicha kiban̄;
ogwu ijo irek ìkitap lek kan̄ me ubọk kwun̄;
îre owu okinyan̄a ebi kpà-nte.
15 Faan̄ ukwuuk me lek ebi ìkirọ ikpak mè ebi ijo ife;
nyi ema osusut me lek ijo inu ema erọbe, geege ikasik.
16 Okumugwem ore ubọọn̄ ire
mgbọ geelek, mgbọ geelek;
ebi ido geelek mêkwaan̄ isan̄a me inyọn̄ ijọn̄ kan̄.
17 Jei Okumugwem, owu onọ mbeek ebi una;
owu mônọ ito ema ekito,
mè irọ ejit kiban̄ inye.
18 Owu môsibi oyerebet inwọn ebi kpà-nte
mè ebi ekitutuku;
ebi linyọn̄ ikike kpebeyaka
ikitap ema ukpook me lek ofifi.