Eji ekilet lek me lek Okumugwem
Okwa kè Debit. Ìkup inyi ogwu òjeen̄ okwa.
11
Okumugwem ke ntap ibot me irak;kabe emi, “Wulu kubọk unọn
si let me inyọn̄ ogoon̄ kwun̄.
2 Kpọ, ebi ijo ife mîtaak olik isan̄a me lek ogbaan̄ kiban̄,
mè iteen̄ oraan̄ inwunwan̄ me lek;
mîyaka ida ebi ekakaan̄ge ofiaan̄ me emen,
mè ibem lek isosook ema ikpan̄.
3 Eyi ikan ochichakabe isan̄a ikeyi,
ìre keke ke ebi eyi Awaji ebeyaka irọ
igak ililibi ileek?”
4 Okumugwem me emen Uwu Mbuban kan̄;
ọmọ me inyọn̄ ogboon̄ ubọọn̄ kan̄ me emen inyọn̄;
òkikpọ ebilene me linyọn̄;
òkimun̄ inu ema ekirọ.
5 Òkiroon̄ ebi ata irọrọ ikpọ;
ire me lek ebi òkpaka ibot mè ebi afa,
ìchacha ema me otutuuk ejit kan̄.
6 Okumugwem môria ukan̄ akaak
mè biridọni igwook ema me lek;
môria si efet òyoyok inu ininyiaan̄ ema akpa.
7 Okumugwem ìre ogwu ata irọrọ;
ìkima si ibe ebilene ekerọ ata irọrọ;
ebi ìkirọ inu ònenen mêmun̄ ọmọ isi me isi.