Ata nkeek me emen ijo mgbọ
Nteme òkup inyi ogwu òjeen̄ okwa: Mêkọt ikpọ me lek Seminit. Okwa kè Debit.
12
Okumugwem, tap ubọk nyi eji;ebi ìkaan̄ ukpook Awaji kpeyaka ikup kubọk ge;
ikeya si, ebi ìkekeke inye me lek kwun̄
mîta isan̄a me etete bọn ebilene.
2 Otutuuk ene ekikan̄ ataak inyi ebi melek kiban̄,
mè ikisa otu alọm òbet lek uchọk ifiaan̄ lek kiban̄;
kpunu ogwu ikarege isi iba.
3 Okumugwem, rọ mè otu alọm uchọk cha ichit,
mè otu òkigugo lek cha igba.
4 Chit otu ebi ìkibe, “Otu kiji înye me lek ikọ;
otu alọm kiji si ọmọ òwa
itutumu inu òkup eji me uyọt.
Ìre ekene obotọ ikọ inyi eji?”
5 Okumugwem onenibe, “Mgbọ keyi,
bak me lek utuk ekituk ebi ijo irek,
mè mfi ebi una ekito,
mânan̄a ikeke,
mè ibem ema, ubọk ema eweekbe.”
6 Use Okumugwem kpunu okpa me lek;
use kan̄ ìtana kubọk alata okuket
ekalabe mgbọ jaaba me emen uchieen̄.
7 Jei Okumugwem, owu môbem eji,
mè inyan̄a eji bene me mgbọ yi si re mgbọ geelek.
8 Ebi ìkpaka ibot inyi owu ekakana eji me ijọn̄;
bọn ebilene eyaka ikitọtọn̄ ijo inu.