Diosan 'akë ñu chaiira 'imainun unin 'akë ñu ñui David kanta bana
8
Dios mix kamina nun 'apuira 'aish kamabi menu 'ain.¡Mix chaiira 'ain ka kamabi menu min anë 'ikën!
¡Usa 'ain ka min 'akë ñukamax naíkamë 'ëo sënë́nkë a manámi sënënia!
2 Tuá xukama kikë bana 'imainun tuá chabu atux ka mi kushikin rabi kantaxa,
usai 'ikin ka axa mimi nishkë unikama 'aisamaira 'ikëbi nëtë́miaxa.
¡Usakin 'akin ka axa mimi nishi 'ësë́nankë unikama banaima nëtë́nun 'imiaxa!
3 Uisaran karana minbi unio naíkamë 'ëo, 'uxë, 'ispa akama min unio a isin anun kana,
4 ësokin sinanin: ¿Añu kara unix 'ik?
¿Añu karanuna nux unishi 'aish 'iti 'ain?
¿Uisa kupín kaina ami sinani mix 'itsaira bënëtin?
5 Nukama kamina mi 'iskësaribi 'itánun uniokën,
'anan kamina 'apu 'akësaribi okin nu bërúankën.
6 Usakin 'axun kamina min uniokë kamabi ñun 'ibu 'inun nu 'imianan,
kamabi ñu a manámi 'ixun bërúain:
7 a ñuinakamax ka ovejakama 'imainun vaca aín bënëkama 'ianan ñuina raëkëmakama aribi 'ianan,
8 ñuina pëchiñu manan nuánkë a 'imainun bakanu 'ikë ñuina 'ianan,
parúmpapanu 'ikë ñuina akama 'ikën.
9 Dios mix kamina 'apuira 'ianan kamabi ñu manámi 'ain,
¡usa 'ain ka kamabi menuxun min anë 'unánkë 'ikën!