Diosan banasa upíira ñu ka 'aíma 'ikën
16
¡'Ën 'Ibu Dios, 'ë kamina bërúanti 'ain,minmi 'akinti sinánkin kana 'ën mi barin!
2 'Ën kana mi kan:
Mix kamina 'ën Dios 'ain usa 'ixun kamina min 'ë upí 'imin;
usa 'ain ka min 'akinkësaribi okin an 'ë 'akinti bëtsi ñu ka 'aíma 'ikën.
3 Ënë menuxun rabikankë dios ax isa kushiira 'ikë,
kiax ka aín unikamax kia,
4 'aínbi ka uikaman kara a dios rabia akamax paëtani tëmërati 'ikën,
usai 'ikin atun a rabimainun kana.
¡'Ën uínsaranbi atun 'akësokin ñuina xaroxuntima 'ain!
¡'Ën kana uínsaranbi aín anë ñui banatima 'ain!
5 Mix kamina 'ën Dios an kamabi ñu 'ë 'inánkë a 'ain;
min kamina upiti tsónun 'ë 'imian.
6 Upí me akana a biti sinánkë 'ixunmabi 'ën bian;
¡asabika usa 'aish ka 'ën bikë me ax bëtsi unikamanan 'ikëbi mi 'ë 'inánkë 'ikën!
7 'Ën kana min banan 'ësëkin mi 'ë 'unamikë a kupí mi rabiti 'ain;
usa 'ain ka min bana 'unánkë 'anbi ë 'imë́bi upí 'imikin bërúaia,
8 'ëx kana uínsaranbi ami manutima Diosmi sinanin;
usa 'ain kana axa 'ë rapasu 'ikëbëtan, uisa ñu kara 'ikëbëbi ami katamëti tsóti ëniman.
9 Usa 'ain kana 'itsaira 'ën nuitu ukëmëuishi ami sinani kuëëinra kuëënin.
Usa 'aish kana 'ën nami chuámarua tani kuëënti 'ain,
10 min kamina anu uni ñuia maínkë anu 'ikëbi 'ë ëntima 'ain,
¡usa 'ain kamina an mi ñu 'axunkë uni uinubi ëntima 'ain!
11 Usa 'ixun kamina uisai karana tsóti 'ai kixun 'ë 'unánmiti 'ain.
Anu mix 'ikë anu ka anuax 'itsaira kuëëntisabi 'ikën;
anuax ka min unikama 'itsaira kuëënti 'ikën.