Diosan unio ñukama 'imainun 'ain bana ñui kikë bana
19
Naíkamë 'ëo an ka Dios ax ka chaiira 'ikë kixun unin 'akësa okin ñuia;'imainun ka an unio naíkamë 'ëo kuman batsisa anribi a ñukama ñuikin nu 'unánmia.
2 Achúshi nëtë an ka bëtsi nëtë aribi unin 'akësa 'inun kaia;
'imainun ka imë́ anribi bëtsi imë́ 'iti aribi unin 'akësa 'inun kaia.
3 Usai 'ia ka uínbi aín bana chanioima 'ianan ka
ax kia uisa banabi kuatima 'aínbi ka nu 'unánmia,
4 'aínbi ka kamabi menu 'ikë unikaman aín bana 'unania,
usa 'aishi ka uinu kara me kuainakëakëxa anuxunbi aín anë kuakë 'ikën.
Anu ka Diosan achúshi ñu anua bari 'iti 'akëxa,
5 anuax ka bari achúshi uni 'ain xubunuax mëratiñu 'aish kuëëni 'ikësai 'ianan,
achúshi uni abáti 'unan axa kuëëni abákësa kiani kuania.
6 Usa 'ain ka bari naí meukuax urui kuainakëkin amoribi pë́kaia,
Usai 'ikian pë́kakëx ka uínbi barin xana okin pë́kakëmama 'ima.
7 Diosan banax ka upíira 'ikën, an ka nu upiti tsónun 'imia an 'akë ñukama ax ka upí 'ikën.
Kamabi Dios kikë bana ax ka asérabi 'ikën, an ka uni mënin sinánñushi usa 'ikëmabi sinánñuira 'inun 'imia.
8 Dios kikë banakama ax ka asérabi 'ikën, usa 'ixun ka an ñu upí 'akë unikama 'ain nuitu kuëëmia.
Ax kikësabi oi 'iti Diosan bana an ka bëtsi banakama këñun mëskukëma 'ikën, usa 'ixun ka unin sinan upí 'imia.
9 Diosmi katamëti ax ka upíira 'ikën,
usa 'ain ka uínsaranbi ax këñutima.
Aín bana kikësoi tsóti ax ka asérabi 'ikën,
usa 'ain ka axa ami katamëkë uni ax kikësai 'i tsóti ëntima 'ikën.
10 ¡Usa 'aish ka kuri upíira kupíkë usamaira 'ikën!
¡'ianan ka buna rëpa bataira 'ain bánu 'ikë usaribi 'ixun nu 'unánmia!
11 'Ianan ka a banakamaxribi an 'ë 'unánmikë 'ikën, usa 'ain kana ñu 'aisama 'aisa tankinbi,
min uni 'ixun ax kikësokinbi 'ati 'ain.
12 ¿Uin kara abi ñu 'atima 'atankëxun 'ënbi kana usakin 'a kixun sinánti 'ik?
¡Usa 'ain kamina mix Dios 'ixun 'ën 'akë 'uchakama 'ë mëníoxunti 'ain!
13 'Ianan kamina min uni 'ikë 'ëx rabiakakë a 'ë mëníoxunti 'ain;
usa 'ain kamina rabiakakë anma usai 'inun 'imia 'ë 'akinti 'ain.
Mëníoxunkin 'akinia ka achushi uni 'ikë uínbi 'ë 'ucha otima 'ikën,
'ianan kana mix kikësoi 'isama tani chaiira 'uchakë anuax ië́kë 'iti 'ain.
14 Min iskëx ka 'ëx kikë banakama 'ianan,
'ën sinánkë ñukama asábi 'iti 'ikën,
mix kamina an 'ë bërúankë 'ianan an 'ë ië́mikë a 'ain.