Dios tëmërakinbi rabi ami kantati bana
22
'Ën 'Ibu Dios, mix 'ën 'Ibu Dios 'ixun kaina,¿uisa kupín 'ë ëan?
¿uisa kupín kaina 'ë ië́mi aíma?
¿uisa kupín kaina 'ëx tëmërai masá nuitukin kakëxunbi 'ën bana kuatima?
2 'Ën 'Ibu Dios nëtë 'imainun 'imë́bi kana 'ëmi 'akinun kixun mi kain,
'aínbi kamina 'ën kakëxunbi kuatima;
¡'ëx anun tantiti nëtë ka 'aíma 'ikën!
3 Usa 'ain kamina mix bëtsi dios kamasamaira 'aish uisaibi 'ikëma 'ain;
usa 'ikë ka Israel unikaman mi rabiti 'ikën.
4 Nun papakamax ka mimi katamëakëxa;
usai 'ia mimi katamëtia kamina min ië́mikin 'akiankën;
5 mia 'akinun kixun ñukákëxun kamina ax ami nishkë unikaman mëkënuabi;
mimi katamëtia 'akinima 'ikima 'akiankën.
6 Usa 'aínbi kana 'ëx achúshi unisama achúshi xënasara 'ain;
¡usa 'ëx 'ain ka 'ëmi uni kuaia!
7 Uikaman kara 'ë isia ax ka 'ë isi 'ëmi kuaia;
'ianan ka 'ëmi kuai ain kuëbí kuëñushi ain maxká shaíkai tënkëti,
8 ësai kikania: Ënë unix ka Diosmi katamëkë 'iakëxa;
usa 'ikë ka Diosan ië́mikin 'akinti 'ikën.
Ax ka Diosan 'akinti 'itsaira kuëënia kikania.
9 Usa ka: usa 'ain kamina min 'ën titan pukunuax bakënun 'ë 'imiakën;
'imixun kamina 'ain kisinu makaxun 'ain xuma 'amikin 'ë kanionun 'imiakën.
10 'Ën titan 'ë bakënkëma pain 'ikëbi,
kamina 'ë bërúankën;
usa 'aish kamina 'ën titan puku 'ukëmëu,
'aínbi mix 'ën Dios 'iakën.
11 'Ë 'ura kamina 'itima 'ain,
anun 'ëx tëmërati nëtë ka 'urama 'ikën,
'imainun ka an 'ë 'akinti uibi 'aíma 'ikën.
12 Axa 'ëmi nishkë unikaman ka vaca bënëkama në́kë,
Basánnu 'ikë usaribi 'ixun 'ë bëarabuianxa;
13 usa 'aish ka paru 'inúan në́kë
kamaxa kuëëti anchakë usaribiti 'ëmi banai kikania.
14 'Ëx kana 'umpax ampë́nkikë usaribi 'ain;
'ën xokama ëchikibutia tankësa kana tanin.
'Ën nuitunëx ka charokëxa xara kuëxu charákësa usaribi 'ikën.
15 'Ën kuëbitax ka mapú xuikëx ëski 'irukë usaribi 'ikën;
'imainun ka 'ën ana manxantanu takáshkikë usaribi 'ikën.
¡Usa 'ikë kamina bamax menu rakakësa 'itánun 'ë ëan!
16 Kamun 'itsan, 'akësaira okin ka uni
'atimakaman 'ë bëara buianxa;
usakin 'akin ka 'ën mëkënu 'anan 'ën taënu
'inúanën uni raëxpakësa okin 'ë 'axa.
17 ¡Usa 'ain ka 'ën xokama mëratia iskin tupuntisa 'iaxa!
Ax 'ëmi nishkë unikaman ka ënkimaira 'ë bërúaia;
18 usa 'ixun ka atun 'ën chupa,
uin karaisa bitsia iskatsikixun ñuratsu nikin anun pain tanxun bikanxa.
19 Usa 'aínbi kamina mix Dios an 'ë kushiokë a 'ain,
¡usa 'ain kamina 'ë ëntima 'ain!, ¡bëríbi kamina 'ë 'akini 'ëbë 'iti 'ain!
20 Aín manë xëtokën 'akin bamamiti 'ikëbi kamina 'ë ië́miti 'ain,
usa 'ixun kamina kamunsa unikaman an 'ë rëtënun ëntima 'ain,
21 atux paru 'inúansa 'aínbi kamina anuabi 'ë ië́miti 'ain,
¡atúxa vaca bënëkama manchañusaribi 'aínbi kamina anua 'ë ië́miti 'ain!
22 'Ën kana mi ñuikin 'ën aintsikama kanan,
anuxun mi rabiti xubunuax mi rabi atubë kantati 'ain.
23 Mitsun kamina a 'unánkë 'ixun Dios, rabikanti 'ain.
¡Jacobnën rëbúnki Israel unikaman mitsun
kamina aín kushi 'unánkin Dios rabikanti 'ain!
24 An ka ax Dios 'ixun ñuñuma uni tëmërakin
ñukákëxun kuakëmasa okinma 'akinia.
¡Usa ixun ka 'akinun kixun ñukákëxun kuakin 'akinia!
25 Min kaisa min unikama 'uakamë 'ëokë atun
kuamainunbi kana mi rabiti 'ain;
an mi rabikë unikaman ismainunbi kana 'ëx kikësabiokin mi 'axunti 'ain.
26 Ñuñuma unikama mitsux kamina,
puchákin pitankëx kuëënkanti 'ain;
ainan 'ixun Dios rabi kamina mitsux,
'itsabaritia 'imi tsókanti 'ain.
27 Kamabi ñakánu 'ikë Israel unibu 'imainun,
bëtsi nëtënu tsókë unikamanribi ka
ami sinánkin Dios rabiti 'ikën;
¡usakin 'ai ka an ismainunbi rantinpuruni tsóbukanti 'ikën!
28 Dios ax ka 'apuira 'ikë usa 'ain,
usa 'ixun ka kamabi me kuainakë anu 'ikë ëmakamanu 'ikë unikama ax kikësabiokin 'anun 'amia.
29 Usa 'ikë ka ami ñanati tëtúbukin ashi rabi
kamabi uni axa 'uakamë 'ëoi tsókë unikama 'imainun,
axa ñuti 'urama unikama,
atúnribi ka mimi ñanati 'ikin mi rabikanti 'ikën.
30 'Ën rëbúnkikamax ka Dios ashi rabianan,
a ñui xënibua 'aínbi tsóti 'ikën;
31 'imainun ka axa bërí bakënti tuákamax,
kani min kamina ñu chaiirabu 'akë kiax kiti 'ikën.