Diosan ka 'ën 'Ibu 'ixun an ñuina 'arakakë bërúankë unisa 'ixun 'ë bërúaia kikë bana
23
Diosan ka an ñuina 'arakakë unin aín ñuina bërúankësa;usaribi okin 'ë bërúaia, usa 'ixun ka uisa ñu kara inutiabi 'ë 'akinia,
2 an ka unin basi paxa upíira pimitankëxun aín ñuinakama tantimikësa usaribi okin ka Diosan 'ë 'imia,
'imianan ka 'umpax bëchuni pakaxkikëma a xëakin 'ën shima tërënun 'ë 'imia,
3 'ianan ka amiribishi ami kushitëkënun 'ë 'imiaxa,
'imianan ka bai upitan nikësa 'inun uisa ñu kara upí 'ikë ashi 'anun 'ë 'unánmia,
ax ka usakin ñu 'axunkin aín anë rabiti kuëënia.
4 Anun nisama anun kuaníbi kana añu ñubi inútimi rakuë́tima 'ain,
Dios mix kamina 'ëbë kamabi nëtën 'ain;
'imainun kamina ñu upíshi 'anun 'ë 'imiti 'ain.
5 Axa 'ëmi nishkë unikaman 'atimokin isiabi kamina;
atun ismainunbi anu pinux timë́ti 'axunkin 'itsaira kuëënun 'ë 'imin,
usakin 'anan kamina 'ën maxkánu ro tutukakin anun 'ë machabonun 'amian,
usokin 'anan kamina 'ën ami xëati aribi buákakin 'aruan.
6 Min asérabi nuibanan 'ë 'akinkëx kana nëtë itsi nëtë itsi
inúmi mibë tsóti 'ain 'ën 'Ibu Dios,
mibë kana xënibua 'aínbi nëtë́timoi min nëtënu 'iti 'ain.