Nukën 'Ibu anuxun rabiti xubunu timë́xun rabiti ñuikë bana
24
Nukën 'Ibunan ka kamabi me kuainakëa ax 'ikën,usa 'ain ka kamabi ñu anu 'ikë a 'imainun,
kamabi uni anu tsotia.
2 Nukën 'Ibun ka me uniokin parúmpapakamanu an tuinti 'anan
ënë me uniokin bakakamanu 'anan 'umpaxnuribi 'akëxa.
3 ¿Uix kara anua Diosan bashi kakë upíira anu kuanti 'ik?
¿Uix kara anua 'ikë 'ain xubu upíira anu Dios rabi kuanti 'ik?
4 Anu kuanti uni ax ka upí sinánñu 'ixun ñu 'atima 'ati sinani 'uchaima 'ianan;
Dios asérabi ain anë ñui kikëma 'iti 'ikën.
5 Usa unikama ka Diosan ië́mianan,
upíokin sinánxunkin 'akianan usakian ñu upíokin 'ati 'unamiti 'ikën.
6 Usai ka Dios an barikë unikama ax 'iti 'ikën,
usai ka Israelkaman Dios 'akinun an ñukákë unikama atux 'iti 'ikën.
7 ¡Ax irapain 'ia Jerusalénnu 'ikë xëputi chaiirakama ka xëókiti 'ikën!
¡Xëókia anun atsían xëkuë ax mërakëbë ka
anun 'apuira ax atsínti 'ikën, ax ka kamabi unin 'apu 'iti 'ikën!
8 ¿Ui kara 'apuira 'ianan kushiira ënëx 'ik?
¡Ax ka Nukën 'Ibu kushiira 'ianan rakuëma 'ikën!
¡Ax ka Nukën 'Ibu 'aish rakuëtimaishi 'akanania!
9 ¡Ax irapaia 'ia Jerusalénnu 'ikë xëputi chaiirakama ka xëókiti 'ikën!
Xëókia anun atsían xëputi mërakëbë ka
'apuira ax atsínti 'ikën, ax ka kamabi unin 'apu 'iti 'ikën.
10 ¿Ui kara 'apuira 'ianan kushiira ënëx 'ik?
¡Ax ka Dios kamabi kushiñu a 'ikën!
¡Ax ka Dios 'apuira a 'ikën!