Nukën 'Ibun ka barin pë́kakësa okin 'anan 'ë ië́mia kikë bana
27
Nukën 'Ibun ka 'ë 'akianan bërúaia,¿uimi karana 'ëx rakuë́ti 'ain?
Nukën 'Ibuinshi ka 'ën tsoti bërúaia,
usa 'ain ka 'ëx ami rakuë́ti uni 'aíma 'ikën.
2 'Atima sinánñu unikamabë ka axa 'ëmi nishkë,
akamax 'ë 'atima onux 'ëmi manánux timëtia;
'aínbi ka atuxi 'ë 'akatsi kiax 'ibi rakuë́ti abáti 'ikën.
3 Suntárukaman ka 'ë bëarabuinti 'ikën,
'aínbi kana 'ën nuitu kushiokin sinani rakuëtima 'ain;
'ë 'anux 'ëmi 'ikuatsinuxa mëníokakëbëbi kana chuámashirua 'iti 'ain.
4 Achúshi ñushi kana Nukën 'Ibu ñukan,
usa 'ain kana achúshi ñu ashi kuëënin:
ax ka anuxun Nukën 'Ibu rabiti xubunu 'ëx kamabi nëtë anun tsókë a nëtëkama 'ikën,
a xubunuxun kana rabikin a ñukáti 'ain.
Ñukákin kana an unio ñukama upí iskin ashi rabiti 'ain.
5 Uínsaran kara anun tëmërati nëtë 'ia,
anun ka Nukën 'Ibun anuxun rabiti xubunuabi 'ë bërúanti 'ikën;
usakin 'akëx kana a meu 'aish an tupëonkëx asábi 'iti 'ain.
¡Usakin 'akëx kana mapara kini achúshinu unë́kësa 'iti 'ain!
6 Usai 'ikin axa 'ëmi nishkë unikama abë 'akanankin 'atankëxun kana;
mi ñuina xaroxunti 'ain,
xaroxunkin kana anuxun mi rabiti xubu anuax kuëëni munuma mimi kantakin Dios 'ikë mi rabiti 'ain.
7 Kushin banakin kakëxun kamina mix Dios 'ixun 'ën bana kuati 'ain.
Kuakin 'ë nuibakin kamina, ¡minribi 'ë kati 'ain!
8 'Ën nuitunën sinánkin:
Kana Nukën 'Ibu ñukáti 'ain.
'Imainun kana 'ën Nukën 'Ibu 'ë 'akinun barin.
9 ¡Usa 'ain kamina 'ëmi unë́kësa 'itima 'ain!
¡'Ëmi nishkin kamina 'ë timakësa otima 'ain!
Min kamina 'ëshira ënkinma 'ë 'akinti 'ain,
mix kamina 'ën 'Ibu 'aish an 'ë ië́mikë a 'ain.
10 'Ën papabëtan 'ën titan rakaniabi kamina,
mix Nukën 'Ibu 'ixun ënkinma 'ë isti 'ain.
11 'Ën 'Ibu, mimishi katamëmainun kamina uisaira karana 'iti 'ai 'ë 'unánmiti 'ain;
'unámianan kamina upiokinshi ñu 'anun 'ë 'amiti 'ain
axa 'ëmi nishkë unikama ka anu 'ikë usa 'ain;
12 usa 'ain kamina an kuëënkësa okían 'ë 'akanun 'amitima 'ain,
atux ka 'ëmi 'ikuaianxa usa 'ain ka atun këmëi banakin
bënë́kinshi ñu 'aisa tania.
13 'Aínbi kana 'ën asérabi kamina min ñu 'akën
kixun 'unanin usa 'ixun kana asérabi ka Diosan 'ë nuibakin ñu 'axa kixun isti 'ain,
anun 'ëx tsókë nëtëkama anun.
14 ¡Nukën 'Ibumishi ka uni katamëti 'ikën!
¡Katamëkin kamina kushikin 'atimakin sinántima 'ain!
¡'Imainun kamina Nukën 'Ibumishi katamëkanti 'ain!