Ñu 'atima 'akë chikínati bana
32
Ui unin kara aín 'uchakama chikinakin ñu 'atima 'akë ënia ax ka kuëënia,usai 'ikëbë ka asérabi aín 'uchakama 'aíma 'itánun mëníoxunkë 'ia.
2 Chuámarua ka uni 'atima ñu 'ati sinánkëma ax 'ikën,
usa 'ikë ka Nukën 'Ibun a 'atimokin isima.
3 'Ën 'uchakama mi chikinaxunkëmapain 'aish kana,
nëtë kamabi ini 'ën nami bëtsia tani 'itsaira 'iankën,
4 usai 'ikin kana ñu 'atima 'ai 'uchakësa tankën nëtë 'imainun kamina imë́bi 'ë 'atimokësa 'iakën.
Usokëx kana ro uá barin urukin xarokëx núkai chushikë usaribiti 'iakën,
usai 'i kana 'ën nami 'aisama tani 'iakën.
5 'Aínbi kana 'ën 'akë ñukama këñun 'ën
'uchakama mimi unpukinmaira chikinaxuankën;
'ën 'uchakama mi chikinaxunti sinánkin kana usakin 'akën,
'aia kamina mix 'Ën 'Ibu 'ixun 'ën 'akë 'uchakama 'ë mëníoxuakën.
6 Usa 'ain ka, anúan tëmërati 'ikëbëtan an nuibakë unikaman mi ñukáti 'ikën,
tëmërakë an ka baka chaiira kushi 'ëi mapurutankëxa,
uinu kara sënënia anu sënë́nkësokinribi tëmëramiti 'ikën,
usa 'aínbi ka anbi atu uisabi otima 'ikën.
7 Min kamina mimi katamëkëxun:
'aisama ñu inutiabi 'akianan 'ë bërúain,
usa 'ain kana 'ëmi ië́mikin 'akinkëx kuëëni munuma kantakin mi rabiti 'ain.
8 Nukën 'Ibu ka ësai kia:
'ën kana mi usakinmi ñu 'ati 'unánmiti 'ain,
'ianan kana 'ën 'unánmikin bana ñuixunti 'ain,
kianan kamina uisa upí ñu karana 'ati 'ai 'ë ismikatsi kian.
9 Mix kamina burro 'imainun caballosa 'itima 'ain,
an ka uisakin kara kaia abi kuatima,
usa 'ikë ka anun nikinkin nitsinakin buinati aín,
kuëbínu mëxin tëkërëkaxun nikinkëx uisakin kara 'aia usaibi 'ia,
usa 'ain ka bëtsiokin 'axun 'uramamitisama 'ikën.
10 Uni 'atimakama an ka 'aisamaira paë tani tëmërati kaínti 'ikën,
'aínbi ka axa ami katamëkë unikama 'itsaira nuibanan, 'akinia.
11 Nukën 'Ibumi kamina mënin sinánñushi unikama 'imainun upí sinánñu unikama mitsux;
¡abë timëax kuëni sharákanti 'ain!