Dios an ñu unio 'ikë rabi kantati bana
33
Mitsux Nukën 'Ibun uni 'aish kamina,¡kuëni Nukën 'Ibumi kantati 'ain!
Uni upí sinan ñukama axa a rabi kantaia kuakë ax ka upí 'ikën.
2 Nukën 'Ibu kamina arpa mëëkë aín banabi tankin asabi ka kati 'ain
'anan kamina manë sharikati a mëëkin rabiti 'ain,
3 'ai kamina anun kantakëma kanta ió anúnribi, ¡kantai munuma banai kuëënkanti 'ain!
4 Nukën 'Ibun bana ax ka asérabi upíira 'ikën;
usa 'ixun ka anbia unio ñukama upí 'inun ñuia.
5 Nukën 'Ibun ka aín bana kuati upiti tsókin upí ñu 'akë uni nuibatia;
¡usokin ka an kamabi menu 'ikë unikama nuibatia!
6 Diosan ka aín banan ishi
naíkamë 'ëo uniokëxa,
'anan ka bari 'uxë 'ispa akamaribi uniokëxa.
7 'Anan ka parúmpapa baka anubia
'itinua timë́nun 'imiakëxa.
8 Nukën 'Ibu ax ka kamabi menu 'ikë unin rabikë 'iti 'ikën;
¡'ianan ka kamabi unikama me kuainakëanu 'ikë atúnribi rabikë 'iti 'ikën!
9 An ka aín banakë anuinshia kamabi ñu uninun 'imiakëxa;
'ianan ka ax usai ka 'iti 'ikë kikëbë ñukamax usaibi 'iakëxa.
10 Nukën 'Ibun ka atun sinánkësa okían a rabikëma unikaman
ñu 'ati kuëënkinma a 'atia sinánkë ñukama 'anun 'amima,
11 'aínbi ka Nukën 'Ibun uisakin kara 'aisatania
usakinbi ñu 'akin ax kikësabi oia 'inun 'imia.
12 Diosan unikamax ka aín 'ibua Dios 'ain kuëënkë 'iti 'ikën,
atux ka Diosan kaískë 'ikën.
13 Nukën 'Ibun ka naínuxunbi iskin
kamabi unikama 'unania;
14 'anan ka uinu kara ax 'ia anuxunbi
ënë menu tsókë unikama 'unania;
15 an ka uni sinánñu 'inun uniokëxa usa 'ixun ka
uisakin sinánkin kara unin ñu 'aia akamabi 'unania.
16 Uinu 'ikë 'apuxi ka aín suntáru 'itsaira 'aínbi ië́tima,
'ianan ka aín këru unixi aín kushínbi ië́tima;
17 caballokaman ka uibi ië́mitima 'ikën;
atux kushiira 'ixunbi ka uibi ië́mitima 'ikën.
18 'Aínbi ka Nukën 'Ibun axa ami katamëkëkama 'imainun
asérabi a nuibakë unikama an ka nu nuibati 'ikë kixun 'unania,
19 anun numi 'iti barin a piti 'aíma 'aínbi numin
bamanun ëntima 'ikën.
20 Nukamax kananuna Nukën 'Ibumi katamëtin;
¡an ka nu 'akianan bërúaia!
21 Nukamax kananuna nun nuitu chuámarua tani kuëënin;
nun kananuna aín anëmi sinanin.
22 ¡Usa 'ain kamina mix Nun 'Ibu 'ixun, nu nuibakin 'akinti 'ain,
nun 'akinun mi kakësabiokin kamina nu 'akinti 'ain!