Nukën 'Ibumi katamëti ñuikë bana
37
An 'atima ñu 'akë unikama rabanan nëëti kamina nishtima 'ain,'ianan kamina uni 'atima kaman ñu 'akëbëbi atumi nutsitima 'ain;
2 atun 'akë ñu ax ka basi tëakëx chushikë;
¡usaribiti bënëtishi 'ia!
3 Nukën 'Ibumi katamëkin kamina upí ñuishi 'ati 'ain,
usai 'i kamina ënë menu tsóti Dios kuëënkësabi oi 'iti 'ain.
4 Nukën 'Ibu nuibakin kamina an kakësabiokin 'ati 'ain,
usokinmi 'akëbëtan ka min ñukákësabi okin mi 'axunti 'ikën.
5 Min tsóti Nukën 'Ibun bërúanxunun kamina ami katamëti 'ain;
usaími 'ia ka an mi 'akinti 'ikën.
6 Usai 'ikin mi 'aia kamabi unin min 'akë ñu iskë ax ka
asérabi 'aish barin xamarukin pëkakë usaribi 'iti 'ikën.
7 An 'akinun kiax bënë́kinma kamina Nukën 'Ibun mi munu;
'akimainun kaínti 'ain.
Usai 'ikin kamina an ñu 'atima 'akë unikaman,
'akësokin ñu 'atima 'ati sinántima 'ain,
atun ka ñu 'atima 'atishi sinania.
8 Mix nishkë a ëni kamina nishkësa 'itima 'ain;
nishkë an ka nun sinánkëkama 'atima oia.
9 An ñu 'atima 'atishi sinánkë unikamax ka a menuax chikínkë 'iti 'ikën,
'aínbi ka axa Nukën 'Ibumi katamëkë unikaman a me biti 'ikën.
10 Ënuax 'itsama baritia 'ikëbë ka an ñu 'atima 'akë unikama 'aíma 'iti 'ikën;
usai 'ikë barikinbi ka uinuabi mëratëkëntima 'ikën.
11 'Aínbi ka uni aín sinan mëninshi
akamax kuni Diosan atu 'inánti menu 'iti 'ikën,
anuax ka ax 'ikësamairai chuámarua tani kuëënti 'ikën.
12 An ñu 'atima 'akëira unikaman ka uisakin kara an ñu upí 'akë unikama 'atima oti 'ikë kixun baria,
usai 'ikin ka ami xuamati nishkin upiokinbi istisama tania.
13 Usai atux 'ikëbëbi ka Nukën 'Ibu anúan atu 'atima oti nëtë,
ka 'urama kuatsinia kixun 'unani atumi kuaia.
14 An ñu 'atimaira 'akë unikaman ka aín manë xëtokë bianan aín kanti kanukin
anun uni sinan mëninñushi 'aish,
¡upitax tsókë akama 'akatsikixun bitsia!
15 'aínbi ka aín manë xëtokë anunbi abi tarókati 'iti 'ikën,
usai 'ikëbë ka aín kantikama ax tsasipakë 'iti 'ikën.
16 Uni upí sinánñu axa chukúmashi ñuñu 'ikëxbi ka,
uni 'atimakamaxa ñuñu 'ikë usamaira 'ikën.
17 Nukën 'Ibun ka an 'atima ñu 'akë unikama 'atima okin këñuanan,
an ñu upí 'akë unikama 'akinti 'ikën.
18 Nukën 'Ibun ka axa uisa ñu 'atimabi 'aíma tsókë unikama bërúaia,
a unikama anu 'iti nëtë ax ka uínsaranbi këñutima 'ikën.
19 Usa 'ain ka anúan numi 'iti nëtë 'ikëbë, numin 'i rabinkësa 'ima,
raírinëxa a piti ñuñuma 'imainun, atun piti 'itsaira 'iti 'ikën.
20 'Imainun ka ñu 'atima 'akë unikamax basi chushikë bimikëxa rëkirutankëx këñúkë usaíshi 'iti 'ikën;
usai ka axa Diosmi nishkë unikama 'iti 'ikën, 'ianan ka kuin tëxëkirui kuani nëtë́kë usaribiti 'iti 'ikën.
21 Ñu 'atima 'akë unin ka 'inantëkënuxun bëtsi unin ñu bixunbi a kupín aín 'ibu kupíoima;
'aínbi ka uni upí sinánñu an kuni usakin 'akinma aín ñu bixun asérabi aín 'ibu 'inántëkënia.
22 Uikamax kara Nukën 'Ibun upíokin sinánxunkë 'ikë akamax ka Nukën 'Ibun 'inánti me anu 'iti 'ikën,
'aínbi ka Nukën 'Ibun upíokin sinánxukëma unikama ax 'atima okin masókë 'iti 'ikën.
23 An ñu upíokin 'aia isi kuëënkin ka
Nukën 'Ibun aín uni uisai kara tsóti 'ikë kixun 'unánmia;
24 usakin 'akin ka uisa ñu 'atima 'ai kara pakëtia
usai 'iabi ka pakëkëmasa 'itánun Nukën 'ibun 'akinti 'ikën.
25 'Ëx kana bëná 'iakën, bërí kana 'ëx uni kaniakëkë 'ain, 'aínbi kana uinsaranbi uni ñu 'atima 'akëma kamaxa ñuñuma 'i tëmëraia isama 'ain.
'Ianan kana aín bakë bëchikëkamaribi uínsaranbi bëtsi unikama aín piti ñukáti nitsia isama 'ain.
26 Usa 'ixun ka kamabi nëtën nuibakin bëtsi aín ñu na 'inántëkënun 'inania;
usakin 'akëbë ka aín bakë bëchikëkama ax upíokin sinánxunkë 'ia.
27 Ñu 'atima 'akë ënkin kamina ñu upíshi 'ati 'ain,
usakin 'ai kamina anu xënibua 'aínbi tsóti nëtënu 'iti 'ain.
28 Nukën 'Ibu Diosan ka upí ñuishi 'ati kuëënia.
Usa 'ixun ka an ënkinma a rabikë aín unikama ënima;
'aínbi ka an ñu 'atimaira 'akë unikama këñuia këñukin ka atun bakë bëchikë rëbúnkiñuma 'inun 'imiti 'ikën.
29 An ñu upí 'akë unikama a ka Nukën 'Ibun nuibakin,
me anua xënibua 'aínbi tsóti 'inánti 'ikën.
30 Uni upí sinánñu ax ka sinaínrax banaia;
usa 'ain ka uni upí sinánñu ax asérabi ñu 'anux këmëima banaia.
31 Aín Diosan bana 'unánkë ax ka aín nuitunënbi sinánkë 'ia,
usakin 'ai ka ¡uínsaranbi ñu 'atima 'ati sinanima!
32 An ñu 'atima 'akë uni an ka
an ñu upí 'akë uni a rëtëti sinánxun 'utunia;
33 Nukën 'Ibun ka usakian atun 'anun ëntima 'ikën,
'ianan ka usakin ka 'axa kixuan ñuitanun 'amitima 'ikën.
34 Nukën 'Ibumi katamëkë 'ixun kamina, min aín bana kikësa okinshi 'axunti 'ain,
usakin 'aia ka anua aín bana 'akë unikama 'itia 'akë anu mi 'imiti 'ikën,
¡Anuxun kamina min bërúnbi an 'atima ñuishi 'ati sinánkë unikama Nukën 'Ibun masókin 'atima oia isti 'ain!
35 'Ën kana an 'atima ñuira 'akë unikamaxa, rabiakakë axa uni 'itsañu 'aish í pëi bunkuira iskë usai 'ia isakën;
36 'aínbi ka bënëtishi nëtë́akëxa;
usai 'ia barikinbi kana anua 'ikë anuabi mërama 'ain.
37 An ñu 'atima 'akëma 'imainun uisa ñu 'atima 'aímabi tsókë uni akamina isti 'ain:
Usa 'ain ka a unin ñu 'akëx upí iskë 'iti 'ikën.
38 'Aínbi ka an bana kuaisamatankë unikamax masókin achirabi bërutanuma këñúkë 'iti 'ikën;
usakin 'akëx ka an ñu 'atima 'akë unikama aín tsótinëx amiribishi unitëkënima 'atima okë 'iti 'ikën.
39 Usa 'ain ka uni upíkama ax Nukën 'Ibun 'akinkë 'ikën,
usa 'ikë ka anúan tëmërati nëtëkama 'ikëbëtan 'akinia,
40 Usa 'ikë ka Nukën 'Ibun 'akinkin ië́mia.
Usakin 'anan ka an ñu 'atima 'akë unikaman 'atima oisa taniabi bërúaia;
usakin ka an 'akinun barikëxun axa ami katamëkë unikama 'aia.