'Ën kana mixmi 'ën Dios 'ain min kuëënkësokinshi mi 'axunti kuëënin
40
Uisai karana Nukën 'Ibumi katamëti 'ai kixun kana 'ën 'unánkën,usa 'ain ka munuma banakin 'ën kakëxun kuakëxa;
2 an ka 'ë uisa ñu inuti kara bamati,
'ikëbi 'ë ië́miakëxa;
usakin 'akin ka chua menu nanë́kësa 'aish bamakësa 'ikëbi 'ë 'akiankëxa.
Usakin 'akëx kana anuax uisaibi 'itëkënuxma maparanu nikësa 'inun 'ëx 'ikë ñukama inuti mëníokakën.
3 Usa 'ikë ka anun a rabi kantanun 'ë Diosan kanta ió achúshi 'unánmiakëxa.
Usai 'ëx 'ia isi ka 'itsaira unix kuëëni chikirakëkin Nukën 'Ibu rabiakëxa.
4 ¡Chuámarua ka uni ax Nukën 'Ibumi katamëkë ax 'iti 'ikën,
usa 'ain ka sinánñumasa 'aish rabinimaishi banakë unikama,
'ianan an Diosmabi bëtsi ñu rabikë a unikaman kakësoi 'itima 'ikën!
5 Nukën 'Ibu, 'itsaira ka min 'akë ñu upíbu 'ikën
'imainun ka numi 'axunkë ñukama axribi 'itsaira 'itsa 'ikën.
¡Usa 'ain ka misaribi bëtsi Dios 'aíma 'ikën!
'Ën kana a ñukama ñuiti 'ain,
'aínbi ka 'itsaira 'aish tupubiankin ñuitisamaira 'ikën.
6 Min kamina bëráma 'asa okin ñuina rëxun xaronan ñu bimi
bixun 'inántëkënti a kuëëniman; usa 'ixun kamina 'aímai këñutanun ñuina xaroxunkin 'uchakëkama mëníonun ñu 'inaínshiti kuëëniman.
Usa 'ixun kamina min bana kikësokinshi nun 'axunti kuëënin.
7 Usa 'ain kana 'ën mi kan: Ënu kana 'ëx 'ain,
usai ka 'ë ñuikin kirikanu kuënëo bana ax kia.
8 'Ën 'Ibu Dios 'ëx kana mix kikësabiokin 'ai 'itsaira kuëënin;
¡usa 'ain kana min 'unánmikë banakama manukinma 'ën nuitunënbi sinanin!
9 Min unikama 'itsaira nëbë́tsinuxun kana;
usaími kikë bana unëkima atu ñuixuan.
¡Minbi kamina upíokin 'unanin 'Ën 'Ibu Dios.
'Ën kana unë́kinma min bana ñuian!
10 'Ën kana min unikama kaímama 'ikima min 'akë ñukama ñuikin kan;
usakin ñuixuanan kana Diosan ka nuibakin nu ië́miti 'ikë kixun kamabi menu 'ikë unikama kakën.
Uisaxunbi kana mix kamina asérabi nuibanairakë 'ai kixun 'aisamaira 'ikëbi min unikama kaima 'iama 'ain.
11 Mix 'ën 'Ibu 'ixun kamina,
'ë nuibakin ëntima 'ain;
min kamina ënkinma asérabi 'ë bërúanti 'ain.
12 'Ëx 'aisamaira ñu 'inúkë ax ka
ñuikinbi sënëoinsamaira 'ikën.
Usa 'ixun ka anbi 'ë upíokin istisama oia;
¡usa 'ixun ka 'ën ñu 'atima 'akë anbi 'ë sinánñuma unisa 'inun 'imia!
Usa 'aish ka 'ën maxkánu 'ikë bubëtan sënë́maira 'ixun uisa ñubi 'aisama okin bëtsi sinánmia.
13 'Ën 'Ibu Dios 'ë kamina ië́miti 'ain, 'ianan kamina bënë́kin, ¡'ishtun 'ë 'akinti 'ain!
14 ¡An 'ë 'aisatankë unikama kamina bëtsi bëtsi ñu inútanun 'imiti 'ain!
¡Usokëx ka rabinkësa 'aish an 'ë 'aisama oti kuëënkë unikamax kuanti 'ikën!
15 ¡Usai 'i ka rabinkiani axa 'ëmi kuaikë unikama abáti 'ikën!
16 'Aínbi ka an mi 'akinun barikë unikamax 'itsaira kuëënti 'ikën;
uikamax kara min ië́mikin 'akinti kuëënia: “¡Akamax ka: ënima Nukën 'Ibu ax ka chaiira 'ikë kiax kiti 'ikën!”
17 Usa 'ain kamina 'ëx ñuumarasa tani bënëti tëmëraia mix Dios 'ixun 'ë manutima 'ain.
Mix kamina an 'ë 'akianan chuámarua 'inun 'imikë a 'ain;
¡'akintimi panakima kamina bënë́kin 'ë 'akinti 'ain!