Diosan 'ë 'akinti kana kuëënin kikë bana
42
(An ënë bana kuënëo uni an ka bëtsi menu buankan 'ixun cuarenta y dos 'imainun cuarenta y tresnu kikë bana ënë kuënëokëxa.)1 Chaxun shimaxun 'umpax xëanuxun barikësa,
usaribi okin kana 'ën Dios 'ixunmi 'ë 'akinun mi barin.
2 Mix kamina Dios an uni tsónun 'imikë a 'ain,
usa 'ain kana 'ën mishi barin.
¿Uinsaran karana anuxun mi rabiti xubunuxun mi rabi kuantëkënti 'ain?
3 Nëtë 'imainun imë́bi kana 'ën piti pikësa 'inun tëmërai bëunan mëskúkin ëniman,
usai 'ia ka kamabi nëtën unikaman 'ëmi kuaikin 'ë ñukatia:
“¿Uinu kara min Dios ax 'ik?”
4 Kixuan 'ë kakan a sinani kana
uínsaran karana 'ëx tëmëra akama sinani anun 'itsaira masánuituti paëin;
'ianan kana anuxun mi rabiti xubu Jerusalénnu 'ikë anuax unikamabë kuanxun fiesta 'akin mi rabi munuma kuëëni 'ia akama sinanin.
¡Ax ka fiesta chaiira nun 'akë 'iakëxa!
5 ¿Uisa kupín karana Diosmi sinanatëkëni kana 'aima kiax kiti 'ain?
¿Uisa kupín karana 'itsaira sinánti 'ain?
'Ën 'Ibu Dios ashi kana an 'ë 'akinun rabiti 'ain.
¡An ka 'ën Dios 'ixun 'ë ië́mia!
6 'Ën kana 'itsaira kana 'atima 'ai kixun sinanin usa 'ain kana añu ñubi 'aisama tanin.
Usa 'ain kana Jordán kakë baka anu 'ikë me anuxun 'anan,
Hermón kakë aín bashi 'imainun Misar anuxun mi 'itsaira sinani kuanti 'ain.
7 Usa 'ain kana 'ën bërí aín bashinuaxa 'umpax kushiira 'ibúti maparami chakabuti banakë an ka 'ë bakami kimikësa tamia;
xukirui kushiira banaia kuakësa, usaribi kana
'ëmi tëmëramikëxun tanin.
8 Usai 'iabi ka nëtën Nukën 'Ibun 'ë nuibakin 'akinia,
'ianan kana imë́ribi ënimaira ami kantain
usai 'ikin abë banakin kana 'ën Dios an 'ë tsónun bërúankë a ñukatin.
9 'Ën kana Dios an nuibakin 'ë 'akinkë, a ësokin kati 'ain.
“¿Uisa kupín kaina 'ëmi manuan?
¿Uisa kupín karana axa 'ëmi nishkë unikaman 'atima okëx masá nuitukë 'aish niti 'ain?”
10 Axa 'ëmi nishkë unikamax 'ë ñui banakë kuakë anunbi kana 'ën namikama paëkësa tani atsan,
usai 'ia ka panakimaira kamabi nëtën atun 'ë ñukatia.
“¿Uinu kara min Dios ax 'ik?”
11 ¿Uisa kupín karana sinanati kana 'aima kiax kiti 'ain?
¿Uisa kupín karana 'itsaira sinánti 'ain?
'Ën 'Ibu Dios ashi kana an 'ë 'akinun rabiti 'ain.
¡An ka 'ën Dios 'ixun 'ë ië́mia!