43
'Ën 'Ibu Dios 'ë 'akinkin kamina;¡bëtsi unikama 'ën 'akësa 'ikëa 'unánkanun 'ati 'ain!
¡akin kamina këmë unikama 'imainun ñu 'atimashi 'akë unikamanua 'ë ië́miti 'ain,
2 mix kamina 'ën Dios 'ianan an 'ë 'akinkë a 'ain!
¿Uisa kupín kaina mi 'ura 'inun 'ë 'imin?
¿Uisa kupín karana masá nuitukë nianan,
axa 'ëmi nishkë unikaman 'atima okë 'iti 'ain?
3 Min kamina min kushi an tirísa;
'ixuan aín bashi upí kakë anu buánan,
anuxun mi rabiti xubu,
anu kuanun 'ë 'imiti 'ain.
4 'Imikëxun kana anuxun mi ñuina xaroxunti 'akë a 'urama oti 'ain 'ën 'Ibu Dios,
anuxun kana mi rabikin 'itsaira kuëënkin,
arpa mëëkin mi rabiti 'ain 'ën 'Ibu Dios,
usa 'ixun kamina 'itsaira kuëënun 'ë 'imiti 'ai 'Ën 'Ibu Dios.
5 ¿Uisa kupín karana sinanati kana 'aima kiax kiti 'ain?
¿Uisa kupín karana 'itsaira sinánti 'ain?
'Ën 'Ibu Dios ashi kana an 'ë 'akinun rabiti 'ain.
¡An ka 'ën Dios 'ixun 'ë 'akinti 'ikën!