Nun 'Ibu Dios ax ka nu 'akini nubë 'ia kikë bana
46
Nukën 'Ibu Dios ax ka an nu kushionan ami katamëkëxun 'akinkë 'ikën,usa 'ixun ka uínsaran karanuna 'aisama ñu inuti anuabi nu 'akinia.
2 Usa 'ain kananuna me shaí kikin,
parúmpapa nëminnu ain bashikama nanë́mainun,
3 nëtë́timaira parúmpapa kushiira ain bëchunkë,
xukirukëbë ain bashikama shaíkikëbëbi rakuë́tima 'ain.
4 Achúshi baka xobutia aín panakakama 'ikësa usaribiti ka
anua 'ikë Diosan ëma Jerusalén kakë ax ëmakamasama upíira 'ikën.
5 Usa 'ain ka a nëbë́tsinbi 'ixun Diosan aín ëma bërúanti 'ikën.
Anuxun ka Diosanbi nëtë pëkarakuatsinia xabakuatsinun 'imiti 'ikën.
6 Uinsaran kara Diosan bëtsi bëtsi menu 'ikë uni aín bana kuanun 'imia anun ka
ratuti bëtsi ëmanu 'ikë 'apukama me shaíkikë anunbi rakuë́ti 'ikën.
7 ¡Nukën 'lbu kamabi kushiñuira ax ka nukamabë 'ikën!
¡Jacobnën rabia Dios ax ka aminu katamëkë 'ikën!
8 Rikuatsinxun kamina ñukama chaiirabu,
kamabi menu Nukën 'Ibun 'akëkama a isi uti 'ain:
9 an ka kamabi menu 'ikë unikama 'akánantëkënia,
anuishi sënë́nmikin aín manë pará 'ianan aín piakama 'imainun,
anuaxa 'akanankë caballonën nirinkë manë 'akë akama mëníonun 'amia.
10 ¡Usakin 'amikëxun ka! “¡'Ëx kana Dios 'ai kixun 'unánkanti 'ikën,
kamabi menu 'ikë unikama manámi kana 'ëx 'ain!
¡'Ëx kana kamabi me manánmira 'ain!”
11 ¡Kamabi kushiiñu Nukën 'Ibu ax ka nubë 'ikën!
¡Usa 'aish ka Jacobnën Dios 'iá 'aish nun Diosribi 'ixun nu 'akinia!