Dios ax ka kamabi unikaman 'apuira 'apu 'ikën
47
¡Kamabi menu 'ikë unikamax ka kuëëni, mëtashkikan!¡'Ianan ka a rabi kuëënkin munuma sharákin Dios rabikan!
2 Nun 'Ibu ax ka kushiira 'aish manámi 'ikë 'aish ami rakuë́ti 'ikën;
ax ka 'apuira 'apu 'aish kamabi menu 'ikën,
3 an ka kamabi ëmanu 'ikë 'ianan bëtsi mekamanua 'ikë unikama nux atusamaira 'ikë,
nu meua 'inun 'imiakëxa,
4 an ka anu nux 'iti me nu kaisxuankëxa nun
chaitiokë Jacob nuibakin kásabiokin, usa 'ain kananuna 'itsaira kuëënin.
5 ¡Nukën 'Ibu Dios ax ka anua 'ikë anu kuaruaxa,
kuëëni sharákian carnero mancha banokëbë ka kuaruakëxa!
6 ¡Usa 'ain kananuna Dios anun kantati anun ami kantakin rabiti 'ain!
¡A mi kantakin kananuna ax 'apuira 'ikë a rabiti 'ain!
7 ¡Dios ax ka ami upiti kantakin rabiti 'ikën!
ax ka kamabi menu 'ikë unikaman 'apu 'ikën.
8 ¡Dios ax ka kamabi menu 'ikë unikaman 'apuira 'apu 'ikën!
¡Usa 'aish ka Dios ax anua tsókë upíira anu tsótaxa!
9 Usa 'ain ka kamabi menu 'ikë 'apukama 'imainun,
Diosan aín uni 'iti kaisa Abrahamnën rëbúnkikamabë timë́ti 'ikën,
usa 'ain ka kamabi menu 'ikë 'apukaman ainan 'ixun aín unikamabëtan Dios rabiti 'ikën.
¡Ax ka ñukama manánmi 'ikën!