Davidtan aín 'uchakë mëníoxunun Dios ñuká bana
51
Mix nuibanairakë, Dios 'ixun kamina 'ë nuibati 'ain;usa 'ixun kamina 'ë nuibakin 'ën 'atimakin sinánxun ñu 'akëkama a 'ë tërënxunti 'ain.
2 ¡'Ën ñu 'atima 'akë a kamina 'ë mëníoxunti 'ain!
¡'Anan kamina 'ëx 'uchakëkama a 'ë tërënxunti 'ain!
3 'Ën kana asérabi upíokin 'unanin min kakësokin 'aíma kana 'atima ñu 'ai 'ucha kixun;
'ën 'uchakë ax ka 'ën sinánnuax nëtë́tisama tania.
4 Mimi kana 'ëx 'uchan,
usai 'ikin kana, a 'aia min uni 'aisama iskë ñu a 'an,
usa 'ain ka min bana usakin ñu 'akatsimi kikë ax asérabi 'ikën.
5 Asérabi kana 'ën titan tuakëxbi 'uchañu 'iakën;
usa 'aish kana 'ën titan puku 'ukëmëu 'aishi 'uchañu 'iakën.
6 Min kamina asérabi sinan mëninñushi uni a nuibatin,
usa 'ixun kamina 'ëribi sinan ñuira 'inun 'imia.
7 'Ën 'uchakë 'ë mënioxunkin hisopo kakë i pëñan anun 'akësa 'itánun 'ë mëniokëx kana upíira bërúti 'ain;
usokin min 'ë mëniokëx kana matsi uxua iskësamaira 'imainun xapu tunkikë usaribi 'inun 'ën nuitu mëniokati upíira 'iti 'ain.
8 'Ë kamina 'itsaira tëmëranun 'imian;
'aínbi kamina amiribishi 'itsaira kuëënun 'ë 'imi tëkënti 'ain.
9 'Ën 'uchakëkama a kamina istima 'ain
'ianan kamina 'ën ñu 'atima 'ati sinánkë a 'ë tërënxunti 'ain.
10 'Ën 'Ibu Dios, 'atima ñu sinánxuma 'anun kamina 'ë ëntima 'ain.
¡'Ianan kamina upí sinánñu bërí 'inun 'ë 'imiti 'ain!
11 Minan 'ikë kamina 'ë ëntima 'ain,
'ianan kamina 'ënua 'ikë min bëru ñunshin 'ë bikuantima 'ain.
12 Min kamina amiribishi kuëëntëkënun 'ë 'imiti 'ain;
min bëru ñunshin an ka uisa kara mix kikësabi oi 'iti min bana a 'ë 'unamiti 'ikën,
13 usakin 'akëxun kana 'ën uni 'atimakama a atun ñu 'atima 'akë ëni kara uisai tsóti 'ikë kixun 'unánmiti 'ain,
'imainun ka usakin 'ën 'unánmikëx uni 'uchañukama ax minan 'iti 'ikën.
14 An uni 'akë uni 'isataniabi kamina a sinánua 'ë mëníoti 'ain,
mix kamina 'ën Dios an 'ë ië́miti a 'ain,
usa 'ixun kana mi rabi kantakin mix kamina usa 'ai kixun 'ën ñuiti 'ain.
15 'Ën 'Ibu min kamina 'ën kuëbitan bananun 'ë 'imiti 'ain,
usakin 'ën kuëbí 'akëxun kana anun upiti kantakin mi rabiti 'ain.
16 'Ën kana kuëënkin ñuina rëtankëxun mi xaroxuanan a mi 'inaínshiti ñukama mi 'inánti 'ain,
'aínbi kamina min a ñukama 'axunti kuëëniman.
17 Mi ñuina 'axun xaroxunkë usamaira ka uin kara Dios 'ikë;
¡asérabi ain nuitunënbi mi sinania ax 'ikën usa 'ikë kamina timaiman!
(Ënë banax ka Davidtan kuënëomasa 'ikën, usa 'aish ka bëtsi menu buánkë 'ixuan uni itsin kuënëosa 'ikën Jerusalén ëma anun kënëkë kënë rurupa 'ain.)
18 Min kamina upíokin Sión kakë me a 'ati 'ain 'anan kamina Jerusalén;
ëma anun kënëara a birutëkënun 'amiti 'ain.
19 Usa 'ain kamina mi 'inaínshiti ñukama a 'imainun,
'aímai këñutanun mi ñuina xaroxunkë a upí isti 'ain,
usokin 'akëbëtan ka anuxun ñuina xaroxunti 'akë anuxun mi ñuina xaroxunkanti 'ikën.