Diosmi katamëti ka uni kuëënti 'ikën.
(Ënëx ka Davidtan kuënëo bana 'ikën)
63
¡'Ën 'Ibu Dios, mix kamina 'ën Dios 'ain!Usa 'ikë kana mi 'aisabi tankin kuëënkin barin: 'ën kana shimaxun 'umpax barikë usaribi okin mi barin;
usa 'ain ka anu 'umpax 'ikëma me ëskikë usa 'ën nán 'ikën.
2 'Ën kana anumi 'ikë min xubunua mi istisa tanin,
anua mi iskësaribi okin kana min kushinmi ñu chaiirabu 'akë a istisa tanin,
3 ¡minmi 'ë nuibakë ax ka ën tsókë usamaira 'ikën!
Usa 'ikë kana 'ën kuëbitanbi mi rabiti 'ain;
4 'anan kana 'ëx anun tsókë nëtëkama anun mi rabiti 'ain,
'usakin 'akin kana 'ën mëkën manámiokin mi ñukáti 'ain.
5 Usai 'itsaira kuëëni kana,
unin timë́xun piti upíokin 'axun pianan xëai kuëënkësa usaribiti 'ikin,
'ën kuëbitanbi kuëënkin mi rabiti 'ain.
6 Ñantan 'uxi rakábukë anuxunbi kana mimi sinanin;
7 mix kamina an 'ë 'akinkë a 'ain.
¡Usa 'ain kana ñuina pëchiñunën 'ain tuá bërúankin 'ain pëchi tëmú 'akësa usaribi okinmi 'akëx chuámarua tani min bërúankëx kuëënin!
8 'Ën namikama ax ka asérabi minan 'ikën;
usa 'ain kamina min mëkën mëkeu anun kushiokin tuinkësa okin 'ë ëntima 'ain.
9 An 'ë 'aisa tankë unikama ax ka,
me kini 'ukëmëu nipakëkë 'iti 'ikën;
10 ¡atux ka manë xëtokën 'akëx bamakë 'iti 'ikën,
usakin 'akë ka an nami paxa pikë raëkëma shórapána akaman aín nami piti 'ikën!
11 'aínbi kana 'apu 'aish Diosmi kuëënti 'ain;
usa 'ain ka uikamax kara ami sinania ax sinanatëkentima oi ami kantati 'ikën,
'aínbi ka axa këmëishi banakë unikama uisaibi banatima okin aín kuëbí xëpúti 'ikën.