Dios ax ka rabiti 'ikën
65
'Ën 'Ibu Dios Jerusalén menu 'ikë,¡mix kamina ashi rabiti a 'ain!,
¡min kamina ñu asérabi 'axunuxun katankëxun 'axunti a kuëënin,
2 min kamina mibë banakin nun ñukákëxun kuatin!
Kamabi menu 'ikë unin ka mibë banakin mi rabiti 'ikën.
3 Nun ñu 'atima 'akëkama an ka nu 'atimakin sinánmia,
'aínbi kamina min nun 'uchakama nu mëníoxunin.
4 Chuámarua ka ami kaískë unikama an tania
usa 'ikë kamina mi 'urama 'inun atu 'imin,
'imikëx ka anuxun mi rabiti xubunu 'ia.
¡Usa 'ain ka min xubunu 'ikë unikama min bana 'aiami 'akinkëx piti pi anun puchacë usa 'ikën!
5 Nukën 'Ibu Dios an nu ëñëmikë,
min kamina mi 'urama 'inuxa atux min xubunu 'inun 'imin, usa 'ixun kamina ñu chabu 'imainun upíira 'axunkin mishi rabinun nu 'imin;
ënë menu tsókë kamabi unikama 'imainun,
parúmpapa 'ukëmanan tsókë unikama ax ka mimi katamëtia;
6 min kamina mix kushiira 'ixun,
anubia 'itinu bashikama uniokën.
7 Min kamina parúmpapa bëchuni xukiruiabi aín bëchunkë nëtë́mianan,
ëmakamanu 'ikë unikama axa nishanani tsuákiruiabi bukubunun 'imin;
8 usakin mi 'akëbë ka anua me sënënakëa anua tsókë unikama axribi,
min 'á ñu upíbu isi rakuë́ti 'ikën;
usai 'ibi ka munuma sharati kuënkëni,
amiaxa bari urukë a 'imainun amia bari kuabúkë amiaxi kuëënti 'ikën.
9 Min kamina mekama bërúankin;
ñu 'apákëkama kómiti 'uíribi 'ibúnun 'imin;
usakin 'akëxuan xëxatan 'ëkin mapurukin chabókëxun ka ñu 'apákëkaman tuaia.
¡Usakin 'akin kamina me anu ñu 'apátisabi 'inua mëníokanun 'imin!
10 Min kamina anu ñu 'apáti me tukakin buinakë a 'aimaia chabátanun 'imianan,
aín tukakëkamaxa 'aímai tsënkitanun 'imin;
usakinmi 'itsaira 'uí 'ibúmikin chabókëx me 'aímai tsënkikëbë ka ñu 'apákëx 'itsaira aín bimi 'inun bimia,
usakin 'akin kamina unin ñu 'apákë 'itsaira biminun upíokin sinánxunin.
11 Min upíokin sinánxunkëx ka bari këñúkëbëtan 'apákë ñu ax 'itsaira aín bimi 'ia,
usai ka minmi usai 'iti sinánxunkë me anuax 'ia;
12 usai 'ikëbë ka anu uni 'ikëma menua 'ikë basi ax paxaira 'imainun,
matá upíirabu 'inun aín bashikamanu 'ikë pëikamaribi mëníokatia;
13 usai 'imainun ka anu pasto 'axunkë anu 'aisamaira oveja 'ia,
'imainun ka me sapankama anuribi 'aisamaira trigo 'apákë 'ia;
¡usai 'ikëbë ka kamabi uni kuëëni kantai sharatia!