Diosan aín kushin unió ñukama ax ka upíira upí 'ikën
66
Kuëëni ka Diosmi kantakan,kamabi menu 'ikë unikama;
2 Dios rabi kantakin ka aín anë rabikan;
usai 'ikin ka an 'a ñukama chaiirabu 'a sinánkin rabikanti 'ikën.
3 Rabikin kamina Dios kati 'ain:
¡Min unio ñukamax ka upíirabu 'ikën.
Mix kushiira 'ixun kamina,
axa mimi nishkë unikama rakuë́tia menu nipakëkësa 'itánun 'imin;
4 kamabi menu 'ikë unikaman ka kuëënkin mi rabia,
'ianan ka kantakin min anë ñuikin mi rabia!
5 Diosan chaiirabu ñu 'akë kamina isi ukanti 'ain,
aín unikama 'axunkin upíira ñu 'akë a kamina iskanti 'ain:
6 an ka parúmpapa me ishi rakati ëskinun 'imiakëxa,
usakin 'imikëbë ka anun nun chaiti okëkama nikiani sikarakëkankëxa;
¡usa 'ain kananuna akama sinani Dios rabi kuëënkanti 'ain!
7 Usa 'ain ka ax kushiira 'ixun xënibua 'aínbi;
kamabi nëtënu 'ikë aín unikama isia;
an ka ñunshinakëkin bana kuakëma unikama ami nishkima,
tsuákirukin 'atima oti rabanan bërúaia.
8 ¡Bëtsi menu 'ikë unikama mitsun kamina Nukën 'Ibu Dios rabikanti 'ain!,
¡usakin rabikin kamina mitsun bana Dios kuamikanti 'ain!
9 Diosan ka uisa ñu kara inuti 'ikëbi nu 'akianxa;
usa 'ixun ka bëtsi ñukama inútisama okin nu bërúanxa.
10 Mix nun Dios 'ixun kamina, nukama uisai karanuna 'i isnuxun nu tankën,
¡usakin 'akin kamina manë uxua charokëxa upíira 'ikësa usaribi 'inun 'imikin nu mëníokën!
11 'Anan kamina anua pakëti 'akënua ñuina pakëkë usairibi nux 'inun nu 'imiakën;
usokin 'akëx kananuna 'itsaira tëmërakën.
12 Usakin 'akin kamina bëtsi unikamanbia atun kuëënkësa okin nu tëmëraminun ëankën,
usokëx kananuna bakan sikánan tsi rëkirukë iskësa anun nu inúmiakën,
usakin pain abëtsinkin kamina anua piti 'aisamaira 'ikë me upí ënu nu bëakën.
13 Usa 'ain kana bërí anuxun mi rabiti xubunu atsínxun 'aímai këñutanun ñuina rëxun mi xaroxunti 'ain;
usakin kana 'ën mi 'axunuxun kakësabiokin mi 'axunti 'ain,
14 usakin 'axunuxun kana,
'ënbi 'aisama ñukama inuti tëmarakin mi kakën.
15 Usakin 'akin kana 'aímai këñutanun ñuina xuairabu a xaroxunkin vaca bënëkama 'imainun cabra 'ain bënëkama;
'imainun carnero akamaribi mi xaroxunti 'ain.
16 ¡Kamabi an Dios rabikë,
mikamax kamina rikuatsinti 'ain!
Rikuatsinxun kamina usakian an 'ë ñu 'axunkëkama ñuixumainun kuati 'ain.
17 'Ën kuëbitanbi rabikin kana,
'ëa 'akinun kixun kakën.
18 'Ëx 'atima sinánñu uni 'ikë ka
Diosan 'ën bana kuakë 'itsianma;
19 ¡'aínbi ka an 'ën bana kuakin
'ën ñukákësabi okin 'ë 'axuankëxa!
20 ¡Usa 'aish ka Dios ax upíokin rabikë 'iti 'ikën,
an ka 'ën ñukákëxun kuashikësa onan,
kana 'aima kikínma 'ë ñu 'axuankëxa!