'Aisamaira tëmërai Diosan 'akinun David kia bana
69
'Ën 'Ibu Dios 'ë kamina ië́miti 'ain,'ëx inúkë ñukama an ka bakami kikësa 'inun 'ë 'imia;
2 'ëx kana 'ian pëanpëankikë nëminra anu nanë́kësa 'inun 'itsaira ñu inúkin tanin,
usa 'ain ka 'ën taën anu amáti 'aíma 'ikën.
'Ëx kana baka nëminra anu 'ain,
anua ka aín xobukë kushiira an 'ë taranpakin ubanpaxa.
3 'Itsaira banai kana tëëxan;
usa 'ain kana 'ën tëru paëia tanin;
¡usai 'ianan kana uni kara bain aia kixun kainkësa okin 'ën Dios kainin!
4 Añu ñu 'ën 'akë 'aímabi ka ax 'ëmi nishkë unikamax 'itsaira 'aish 'ën maxkánu 'ikë bun 'itsasamaira 'ikën;
axa 'ëmi nishkë unikamax ka 'itsaira 'ikën,
usa 'ixun ka bëtsi ñu 'akëmabi 'ë 'aisa tankania,
'imainun ka atun ñu mëkamakë 'ikëmabi 'ë ñu 'inánun kixun ubioia.
5 'Ën Dios min kamina usakin 'atimabi 'ën 'akë ñukama a 'unan;
usa 'ain ka 'ën 'uchakama ax mimi unëtisama 'ikën.
6 Dios kamabi kushiñuira;
¡axa mimi katamëkë akamax ka 'ëx 'uchakë anun rabinkë 'itima 'ikën!
Israel unikaman Dios,
'ëx 'uchakë kupín ka
an asérabi mi barikë unikaman ka
uisai karana 'iti 'ai kiax bënë́kinma munu 'akinun mi barikanti 'ikën.
7 Mi kupín kana unin uisakinshi kara 'ë ñuikëxunbi tënëa;
usai 'i kana 'ën bëmanabi xanai rabian;
8 ¡usa 'ikë ka achúshi uni bërí ukë 'unánkëmasa,
'ën xukë́n 'ibukamanbi 'ë isia!
9 'Ën anuxun mi rabiti xubu a nuibakin
bërúankëbëa 'ëmi bananan an mi ribi ñuikë unikama bana ax ka 'ënan 'aisama 'iaxa.
10 Usa 'ain 'ëx pima 'ianan inia isi
unikama 'ëmi kuaikania;
11 'ën uni ñukëbëtan pañuti chupa pañuia isi
ka 'ë 'usani kamabi uni kuaia,
12 Kamabi unikama ëmanu 'ikë 'imainun,
axa ñu xëax paë́nkë unikamaxribi ka 'ë ñui 'atimati banaia.
13 'Aínbi kana, 'ëx ënima mibë banain.
'Ën 'Ibu Dios, ¡bërí kamina min 'ë 'akinti 'ain!
Min 'itsaira nuibakin, ¡kamina 'akinsatankin 'ë kati 'ain!
'Ën kana ënkinmami, ¡'ë 'akinkëxun 'unanin! Usa 'ain kamina 'ë ¡ië́miti 'ain!
14 ¡Chua menu nanë́kësa 'iabi kamina anua 'ë ëntima 'ain!
¡Axa 'ëmi nishkë unikamaxa 'ëmi nishiabi 'akianan,
kamina baka nëminnu nikësa 'aish tëmëraiabi 'ë 'akinti 'ain!
15 ¡'Itsaira ñu inúkin baka kushin taranpakësa taniabi kamina 'ë ëntima 'ain!
¡'Ianan kana baka nëmin samani birikian ñu nanëni urutëkënkë usanu 'ikësa tanin, usa 'ain kamina anu 'ikësa 'ikëbi 'ë ëntima 'ain!
16 'Ën 'Ibu Dios, mix upí 'ixun;
¡nuibairakin kamina timakësa okima 'ë kati 'ain!
Usa 'ain kamina mix nuibanairakë ixun 'ë nuibati 'ain;
17 ¡usa 'ain kamina min uni 'ikë 'ë kuashikësa otima 'ain!
¡'Atima ñu inuti bënëtia isëshikinma kamina, 'ë 'akinti 'ain!
18 Usa 'ain kamina, 'ë 'urama okin 'ë 'akinti 'ain;
¡'ë 'akinkin kamina axa 'ëmi nishkë unikamanua 'ë bërúanti 'ain!
19 Min kamina 'unan uisai karana 'ichakin ñuikankëx,
katë́ti 'itsaira 'ëx tëmëra kixun;
'imainun kamina uikamax kara 'ëmi nishia kixun 'unán.
20 Usa 'ain kana 'itsaira ñuikankëxun kuakin bëtsi bëtsiokin sinanin;
¡usa 'aish kana bëtsiokin sinani kushiñumasa 'ain!
Usai 'ikin kana ñu 'ati 'unánma unisa 'ixun
uin kara 'ë nuibakin 'akinti 'ikë kixun sinánkin barian.
21 'Ën pitinubi muka ñu 'aruanan ka,
shimaia 'ë ñu bimi baka kachakë xëanun kixun 'inánkëxa.
22 ¡Usa 'ain kamina min atúan timë́xun anu
bukuxun piti 'akë anuxun piti 'axun piaxa,
anunbi atux 'atimanun 'imiti 'ain!
23 ¡Usakin 'imianan kamina bëxuñu 'ixun iskasmanun 'imianan,
nëtë́tima aín xokamax bërënun 'imiti 'ain!
24 Mix atumi nishkin kamina;
¡uisa ñu kara atunu 'ia 'ikëbëa atux tëmëranun 'imiti 'ain!
25 Usaia 'ikëbë ka anua 'ikankë atun ëma ax anu uni 'ikëmasa 'iti 'ikën,
'imainun ka atun xubu ënkë 'ain uixi anu 'ikëmasa 'iti 'ikën;
26 Min kamina 'ë atsánkë 'ikëbi,
'itsaira tëmëramiakën,
usa 'ikëbi ka axa 'ëmi nishkë unikaman paë tamikin 'ë ñui 'ënun kuaikania.
27 Usa 'ain kamina atux 'uchañu 'ikë 'atima okin atun 'uchakë kupín tëmëramiti 'ain;
¡'aínbi kamina uibi atun 'ucha mënioxuntima 'ain!
28 ¡Usokin 'akinma kamina a unikaman anë anua xënibua 'aínbi min unikama mibë 'iti anua atun anë tërënti 'ain!
¡Usakin 'akin kamina atun anë,
anua mix kuëënkësabi oi 'ikë unikaman anë 'ikë anubi atun anë nantima 'ain!
29 'Aínbi kamina 'ëx 'insínkë 'aish tëmërai atsánkë,
'ikëbi mix 'ën Dios 'ixun ië́mikin 'ë 'akinti 'ain.
30 Usakin 'akëxun kana 'ën Dios 'ikë mi ñuikin rabiti 'ain;
usakin kana mixmi chaiira 'ikë min anë rabiti 'ain,
31 usakin 'axunkëx ka Dios asérabi kuëëinrati 'ikën,
baka aín bënë 'axun xaroxuanan,
ñuina 'arakakë manchañu 'imainun 'untsisñu 'axun xaroxunkëxa 'ikë usamairai kuëënti 'ikën.
32 Usokin 'aia isi ka
uni tëmërakëkama ax chuámarua tani kuëënti 'ikën,
usai 'ia isi ka an Dios barikë unikama ax atun nuitunën munu sinanati kuëënkanti 'ikën;
33 usai 'ikëbëtan ka Diosan uni ñuñumakama aín bana kuanan;
aín unikama bëtsi unikaman ñatanbiankin 'ain menu buánkë akamaribi kuakëmasa otima 'ikën.
34 ¡Dios a ka an unio naí me parúmpapa 'imainun,
kamabi ñukama anbi rabikë 'iti 'ikën!
35-36 Diosan ka Jerusalénnu 'ikë unikama ië́mianan Judá ëmakama amiribishi birutëkënkin 'anun 'amiti 'ikën.
Usakin 'akë 'ain ka min unikamax a ëma 'ibuai anu tsóti 'ikën;
usai 'ikin ka min unikaman rëbúnkinën atunanbi 'inun a ëmakama biti 'ikën,
¡Ui unikaman kara min anën mi rabikin mix kikësabiokin 'aia atun ka anu tsókin a ëmakama 'atëkënti 'ikën!