'Apu 'iti uni a Dios ñukáxuan bana
72
¡'Ën 'Ibu Dios, axa 'apu 'iti uni ënë kamina,min 'akësarabi okin upíokin ñu 'anun 'amiti 'ain,
2 usakin 'anun min 'amikëxun ka min unikama 'imainun uni
ñuñumakama aribi upíokin 'akinti 'ikën.
3 'Imainun kamina aín bashi kamakëñun,
matá mekama atunan 'ain uínbi ubíokëma upitax anu bukukanti 'ikën.
4 ¡'Apun ka uni ñuñumakama an kakësabiokin aín bana tankin 'anun 'amiti 'ikën!
¡'Amianan ka aín bakë bëchikëkama aribi upíokin 'akinti 'ikën,
'akianan ka an këmëxun atu 'atima okë uni akamaribi 'atima oti 'ikën!
5 ¡Usa 'ain ka a 'apux min kakësabiokin 'ai
baribëa 'uxë këñutisamapan 'ain xënibua 'aínbi tsóti mimi rakuë́ti 'ikën!
6 ¡Usai 'i ka 'uñe 'imainun nibitan menu ñu 'apákë,
chabónan pasto chabókë usaribi 'iti 'ikën!
7 ¡Usakin 'anan ka ax 'apu 'ixun ñu upíokin 'akëbë,
a nëtëkaman uni upitax bukuti 'ikën,
anúan 'uxë nëtë́ti nëtë 'itámainun!
8 ¡'Anan ka parúmpapa itsi parúmpapa itsi anuabi 'anan,
Éufrates kakë baka anuabi uinu kara me kuainakëakëxa ax 'apu 'ixun ainan 'inun 'imiti 'ikën!
9 ¡Axa ami nishkë unikama,
anu uni 'ikëma menua 'ikë,
akamax ka an ñu 'aia kuati ami rakuë́ti 'ikën!
10 ¡'Imainun ka a 'inaínshiti ñukama bëanan 'apu 'inánti bikë akama Tarsisnu 'ikë 'apukama 'imainun paru nasínu,
'ikë akamanribi bëxun 'inámainun ka,
Sabá 'imainun Sebá anu 'ikë 'apukamanribi bëxun 'inánti 'ikën!
11 ¡Kamabi menu 'ikë 'apukamax ka,
an ismainunbi menu rantinpuruni tsóbuti 'ikën!
¡Kamabi menu 'ikë unikaman ka an kakësabiokin aín bana tankin ñu 'ati 'ikën!
12 An ka uni ñuñumakama 'akinua ñukákëxun 'akianan,
an 'akinti 'aíma 'aia tëmërai uin kara 'akinti 'ikë kixun sinánkë a unikamaribi 'akinti 'ikën.
13 Ax ka uni mënin sinánñushikamax tëmëraia isi anun masá nuituti 'ikën,
'imainun ka ñuñuma unikamaribi upiti tsónun 'akinti 'ikën.
14 'Anan ka an paránxun ñu mëmikë unikamanua chikíanan,
an 'ishtuinshi, bënë́kinshi ñu mëëxunun kikë unikamanua atu chikínti 'ikën,
atun tsóti ax ka an iskëx 'itsaira kupíkë ñusamaira 'iti 'ikën.
15 ¡'Apu ax tsókëpan 'ikë ka!
¡Sabá menua 'ikë kuri 'inankanti 'ikën!
¡Usakin 'anan ka ënkinma abi Dios ñukáxunti 'ikën!
¡Usa 'aish ka ax upíokin sinánxunkë 'iti 'ikën, 'apu ax ka xënibua 'aínbi tsóti 'ikën!
16 ¡Usa 'ain ka a menu 'aisamaira trigo 'iti 'ikën,
'ianan ka bashi rëbu anubi trigo 'aisamaira 'iti 'ikën!
Usa 'ain ka Líbano menu trigo 'apákëxa bimikë usaira aín bimi 'i xubi koia iskë usaira 'iti 'ikën!
17 ¡Usa 'ain ka 'apun anë ax manukima usabi okin sinánkë 'iti 'ikën;
usa 'ain ka an 'akë ñukama kamaxunbi 'unánkë 'aish bari këñutisama pain 'ain an 'akë ñukamaxribi këñutima 'ikën!
¡'Ianan ka kamabi menu tsókë unikama
a 'apu kupín upíokin sinánxunkë 'iti 'ikën!
¡Usa 'ain ka kamabi menu 'ikë unikaman ax ka chuámarua tsotia kiax kiti 'ikën!
18 Chúamarua ka Israel unikaman 'Ibu 'imainun atun Dios ax 'iti 'ikën,
axëshi ka an ñu chaiirabu 'akë a 'ikën;
19 aín anë upíira ax ka xënibua 'aínbi sinánkë 'iti 'ikën.
¡Usa 'ain ka aín kushi ax xënibua 'aínbi kamabi menu 'ikë unikaman 'unánkë 'iti 'ikën! ¡Usa ka 'iti 'ikën ashi!
20 Ënushi ka David Jesénën bakë bëchikë axa Diosbë bana ënë sënënia.