Diosan ka upíokin ñu 'aia kikë bana
73
¡Dios ax ka Israel unikamabë upí 'ianan,uin kara 'ain nuitunën upíokin ami sinania a unikamabëribi upí 'ikën!
2 'Ën kana ñu 'atima 'ai 'uchati chamara 'aisaira tankinbi tënëan;
usai 'ikinbi kana chamara ñu 'atima 'ati tënëakën.
3 'Ëx kana 'atima sinánñu unikama 'imainun axa rabiakakë unikama ñuñu 'ia,
isi atumi xuamati nishakën.
4 A unikamax ka kana bamati 'ai kixun sinanibi bënëtima,
usai 'ika chuámashirua tani uisa ñubi 'inutima bukuia;
5 usai 'i ka bëtsi unikama 'ikësai ñu mëi tëmërakinbi tankëma 'ianan,
bënëruxun raíri unikaman 'akësokin ñu 'aima.
6 Usa 'ain ka atúxa rabiakakë ax 'ain tëutisa 'ianan
atun bënëruxun ñu 'atima 'akë ax atún pañukë chupasa 'ikën;
7 atux ka 'aímai xuati atun bëru bëtsëkërës kikësabu 'ianan;
atun ñu 'atima 'ati sinánkë ax 'aisamaira 'ikën.
8 Usa 'aish ka rabiakati an kuanuma unimi kuai,
bënë́kinshi 'atima ñu 'akatsikiax banaia;
9 usai 'ika aín kuëbitan naíkamë 'ëo këñun Dios ñui banai kia,
'ianan ka kamabi menu 'ikë unikama ñui banaia.
10 Usa 'ikë ka unikaman atu rabia,
'ianan ka atun ñu 'atima 'akëbi mëraima.
11 Usa 'ain ka atux kánani kia: ¿Diosan kara nun 'akë ñukama 'unánti 'ik?
¿Uisaxun kara Diosan ax chaiira 'ixunbi nun 'akë ñu uisaxun kara axa kixun 'unánti 'ik?
12 ¡Uni 'atima sinánñukama, atun ñu 'aia kamina isti 'ain!
Atun ka ñuñu 'i upiti tsókinbi 'itsaira ñuñu 'iti kuëënia.
13 ¡Usa 'aínbi 'ën upiokin sinánkë 'ixunbi atun ñu 'aia iskin,
'ën sinánkë ax ka ñankáishi 'ën usokin sinánti chukúmara pishinkë 'iaxa!
14 Usa 'ain kana kamabi nëtën rishkiakatin,
'ianan kana kamabi nëtën tëmëramikin 'atimokë 'ain.
15 'Ën atun sinánkësa okin sinánkë uni 'ixun kana,
an min bana 'akë unikama 'atimokin 'ën paránkë 'itsían.
16 'Ën kana uisokin kuaisa kara kixun tankën,
'aínbi ka 'ënan kuaisama tëiratë 'iakëxa.
17 Usa 'ain kana anuxun Dios rabiti xubu anu atsínxun ira,
uinuira kara atux 'inuxun 'aia kixun 'unánkë:
18 usa 'ain kamina min atun ñu 'atima 'akënbia,
ñu tuñunuax raishki 'ikësai 'ia atúxbi 'anuax tëmëranun 'imian.
19 ¡Atux ka bënë́kinshi këñúkë 'iti 'ikën!
¡Usa 'ain ka rakuë́kë ax atubëbi këñuti 'ikën!
20 Uínsaran kaina mix Nukën 'Ibu 'aish uníxa aín 'uxkënuax
bësukin aín namákë manukësa usakin,
atun ñu 'akëkama a timati 'ain.
21 'Ëx kana 'itsaira nishkë 'iakën,
usa 'ain kana 'ën sinánkënënbi 'ën nuitu 'itsaira paëi 'iakën,
22 usai 'ikin kana bana kuakëma unisa 'ixun 'ënbi 'unánma 'ain;
¡usa 'aish kana min iskëx achúshi ñuina raëkëmasa 'iakën!
23 Usa 'aínbi kana 'ëx mi ënima mibëbi 'iakën.
Usai 'ia kamina min kushínbi 'ë 'akiankën,
24 'anan kamina min bana kikësabiokin 'anun 'ë 'unánmiakën,
usa 'ain kamina anun ñuti nëtë 'ikëbëtan minan 'ikë, upiokin kamina 'ë ñu 'axuan kakin biti 'ain.
25 ¿Uix kara naínu an 'ë 'akinkë a 'ik? ¡Mixëshi kamina a 'ain!
'Ëx mibë 'ixun kana añu ñubi ënë menu 'ixun kuëëniman.
26 Kamabi 'ën namikama ñusmakësa tankim kana kushiñumasa tanin,
'aínbi ka Diosan xënibua 'aínbi anun tsóti ñu 'ë 'inánti 'ikën,
'ianan ka an 'ë upíokin abi sinánun 'imia.
27 Uikamax kara minan 'isamatania, akamax ka bamakë 'iti 'ikën;
'imainun kamina uikaman kara min bana kikësabiokin 'aisama tania akama këñunun 'imiti 'ain.
28 'Aínbi kana 'ëx Dios 'urama 'iti 'ain,
ax ka 'ënan asábira 'ikën.
Mix kamina 'ën 'Ibu 'ianan 'ën Dios 'ain, usa 'aish kamina an 'ë bërúankë a 'ain,
usa 'ain kana kamabi ñumi 'akë akama ñuiti 'ain.