Diosan kamabi nu nuibanun ñukati bana
80
An Israel unikama bërúankë;an ka Israelnën rëbúnkikama achúshi ñuina aín 'ibun bërúankësa okin bërúanti 'ikën,
mix anu 'ikë anu ka querubinkama ax 'ikën,
¡usa 'ain kamina bërí nukaman ñukákëxun kuati 'ain!
2 Mix kushi 'ixun kamina.
Efraín Benjamín 'imainun Manasés aín rëbúnkikama 'akinti 'ain,
¡usa 'ain kamina min kushin ismikin nukama ië́miti 'ain!
3 Mix nun Dios 'ixun kamina,
¡bëráma 'iásaibi 'inun nu 'akinti 'ain!
¡Upiokin iskimi nu 'akinkëx kananuna nukamax ië́kë 'iti 'ain!
4 Nun 'Ibu Dios kamabi kushiñuira,
¿uínsarainra kaina min unikaman
ñukákëxbimi nishkë 'ixun atu 'akinkëma a ënti 'ain?
5 Nukamina nun bëun piti 'akësokin nun pinun nu 'amian;
usakin 'amianan kamina nun bëun xëati 'itsaira xëakësa okinnu 'anun nu 'amian.
6 Usokinmi nu 'akëbë ka nu 'urama 'ikë unikama numi kuaimainun,
axa numi nishkë unikamaxribi nu iskin usani nukamami kuaia.
7 Nukën 'Ibu Dios kamabi kushiñu nukama kamina,
¡bëráma 'iásabinu 'inun 'akinti 'ain!
¡'Ianan kamina min upíokin nu isti 'ain, usakinmi 'akëx kananuna ië́kë 'iti 'ain!
8 Min kamina nukama Egipto menuabi uvas 'apákë 'akësa obëtsinkin;
bëxun anua bëtsi unikama tsókë me a atu chikínxun nu 'inánkën.
9 Usakin kamina anu nux 'inun me mëníokën,
usakin 'akëx ka 'apákëxa uvas tapuni 'ikësaribiti me tsitsirui 'uakamë 'ëokankëxa.
10 Usai 'ikin kananuna anu 'ikë aín bashikama ñu tupënan 'akësokin tsitsiruakën,
'anan kananuna Líbanu me kamabi tsitsirukin biakën.
11 Usa 'ain kananuna a menuax kaikamë 'ëoi parúmpapa 'ikë anuaxbi.
Éufrates kakë baka anubi sënëni tsóakën.
12 ¿Uisoti kaina nukama usainu nux tsóa a ënun nukama 'imian 'imixun,
usakin min nu 'akë 'ikëa numi nishkë unikaman nun bain inúkin nu 'atima onun 'amin?
13 Jabalí kakë ñuina ninu 'ikësa 'ianan;
¡raëkëma ñuinasaribi 'ixun ka nu këñuia!
14 Usa 'ain kamina, mix Dios kamabi kushiñuira 'ixun;
anumi 'ikë naíkamë 'ëo anuxunbi iskin nu 'akinti 'ain,
'akinkin kamina min 'apá 'uvasa nux 'ikë minan 'inun 'imiti 'ain,
15 minbi kamina uvas 'apákësaribi 'itánun nu bëakën,
usokin 'axun kamina minbi nu bërúankën.
16 Axa numi nishkë unikaman ka nun ëmakama ñu tëaxun xarátanun 'akësokin nëaxa;
usa 'ain kamina min atu 'atima oti 'ain;
17 'aínbi kamina min kaískë uni a 'akinti 'ain,
ax ka bërámabimi kaisa unikama atun bakë bëchikë 'ikëmi ënë menu bëakama a 'ikën,
18 usa 'ain kananuna uínsaranbi nux mi ëni mimi manútënkëntima 'ain.
¡Usokinmi anu tsóti nu 'inánkëxun kananuna mishi rabiti 'ain!
19 Nun 'Ibu Dios kamabi kushiñuira,
¡Bëráma nux 'iásabi tsónun kamina, nu 'akinti 'ain!
¡Usokin nu 'akinkin kamina nu ië́miti 'ain!