Dios anuxun rabiti xubu ax ka upíira 'ikë kiax kikë bana
84
¡Upíira upí ka anumi mix 'ikë min xubu ax 'ikën,Nukën 'Ibu Dios kamabi kushiñuira!
2 ¡'Ëx kana kuëëinra kuëëni anua min xubu
'ikë ëman me mëníokë anu 'iisa tanin!
¡Usa 'ain kana 'ën nuitunënbi kuëëni mixmi Dios an uni tsónun 'imikë mimi kantati 'ain!
3 Chunu 'imainun xapu chunu an ka
anuxun mi ñuina xaroxunti 'akë a
'urama aín na 'atankëxun anu tuaia,
'ën 'Ibu Dios kamabi kushiñuira,
mix kamina 'ën 'apu 'ianan 'ën Dios 'ain.
4 ¡Uikamax kara anuxun mi rabiti xubunu 'ia,
atux ka mi rabi chuámarua tani kuëënti 'ikën!
5 ¡Chuámarua ka uikamax kara min 'akinkëx kuantankëx,
'unánkëma bashi 'abiani anuxun mi rabiti xubu anu bëbaia atux 'iti 'ikën!
6 Uínsaran kara tëmërai bëunan, mëskukë kakë me sapan anun inuti kuani,
anun ka min 'uñe 'ibúkian xëxá 'ëmikin buakarukësa usaribi 'itánun,
a men 'inutia nu upíokin sinánxunkin 'akinin;
7 usai anun kuani ka atux atiainra kushiñuira 'ikanti 'ikën,
'ianan ka Jerusalénnu bëbakin anuxun a rabiti anua Dios kushiira a isti 'ikën.
8 Nukën 'Ibu Dios kamabi kushiñuira,
'ianan Jacobnën Dios, ¡'ën mi ñukákëxun kamina kuati 'ain!
9 Dios nu 'akinkë, 'ixun kamina nu nuibakin min
kaískë 'apu an kara uisakin ñu 'aia isti 'ain.
10 ¡Asábira ka achúshi nëtën min xubunu 'ikë me mëníokëkama anu 'iti ax 'ikën,
ax ka mil nëtëkama 'iminu 'ikësamaira 'ikën!
'Ën anuxun Dios rabiti xubu aín xëputi bërúankë ax ka asábi 'ikën,
ax ka uni ñu 'atima 'akë kamabë 'ikësamaira 'ikën.
11 Nukën 'Ibu Dios an ka 'akianan nu bërúaia;
Diosan ka uni an ñu upí 'ai tsókë akama nuibanan 'akinia,
'akianan kana 'inanima kixun ñu upí ñonkinma 'inania.
12 Dios kamabi kushiñuira,
¡axa mimi katamëkë unikamax ka chuámarua tani kuëëni tsókanti 'ikën!