Diosan kaisa Jerusalén ëma rabi kantati bana
87
A mi ëma biruti Diosan ëma kakë,ax ka upí kakë bashi anubia 'amia 'ikën.
2 Diosan ka Jerusalénnu 'ikë ëma xëkuëkama bëtsi ëmakama Israelnu 'ikë 'akësamaira okin upíokin bërúaia,
Israelnën anu 'inuxun xubukama 'asamaira okin.
3 Diosan ëma upíira,
mi ñui ka unikama upíira ka ax 'ikë kiax kikania:
4 Ësai ka Dios kiaxa, an 'ë 'unánkë ëmakama raírinua kana ënë uni raíri kaísan, akamax ka 'ikën,
Egipto, Babilonia, Filistea, Tiro, 'imainun Etiopía,
ënë ëmakama ka Jerusalénnu 'ikë unikaman ka 'unánxa.
5 Usa 'ain ka a ëmanu 'ikë unikamax kikanti 'ikën:
Sión kakë ëmanuxun kananuna Dios 'unan kiax kinkanti 'ikën, Dios manámi 'ikë kushiira ax ka usai kia.
'Imainun ka Jerusalénnu 'ikë unikamaxribi usaribiti kiti 'ikën.
6 Nukën 'Ibu ka kirikanu anubia 'iti ëmakaman anë kuënëoti 'ikën:
a unikaman ka anuax bakë́an 'ixun Jerusalénnuxun Dios 'unánkëxa.
7 Usa 'ain ka ax kantai ransakë, a unikamax kiti 'ikën:
nun kananuna Dios Jerusalén ëmanuxun 'unánkë kiax ka kikanti 'ikën.