Diosan an kakësabiokin 'akinuxun David ka bana
89
'Ën 'Ibu Dios, 'ëx mimi kantaikana mix kamina nuibanankë 'ai kiax kianan;
xënibua 'aínbi kana mix kamina ñu 'atima 'ati
kuëënkëma a 'ai kiax mi ñui kiti 'ain.
2 'Ianan kana munuma banakin min uni nuibakë ax ka këñutima okimi 'á 'ikë kixun ñuianan;
mix kamina usa 'ai kixun ñuikë ax ka naíkamë 'ëo usaribi bëtsiokëma usabi okin ñuikë 'iti 'ikën.
3 Min kamina achúshi ñu min uni Davidbëtan 'akën;
'akin kamina ñu 'axunuxun min kaískë uni kakën:
4 “'Ën kana mix ñua 'aínbia min rëbúnkikamax
mix 'iásaribiti nëtë́tima 'apu 'inun 'imiti 'ain.”
5 ¡'Ën 'Ibu Dios naíkamë 'ëonuxunbi ka min ángel kamanbi ka unin iskëma chaiirabu ñu mi 'a
sinánkin mi rabiti 'ikën!
6 ¡Uinubi ka naínu misaribi, dios 'aíma 'ikën 'ën 'ibun!
7 Dios chaiira 'imainun ami rakuë́ti mi ka,
naínuxun min ángelkaman mi bëarabuinxun rabikania.
8 Nukën 'Ibu Dios kamabi kushiñuira misaribi axa kamabi kushiñu ka 'aíma 'ikën;
usa 'ain ka min nan banakama ax asérabi 'ikën;
¡uinubi ka misaribi bëtsi Dios 'aíma 'ikën!
9 Min kamina parúmpapa 'unsaira 'inua aín bëchun tukiabi
aín bëchunkë axa bukubunun 'imin.
10 Min kamina parúmpapanua bëtsi ñuinakama chaiirabu 'akësa okin 'akëxa bamati 'ikëbi Rahab 'ië́miakën;
usakin 'anan kamina axa mimi nishkë unikama min kushínbi abánun 'imiakën.
11 Me 'imainun naíkamë 'ëo ax ka min unio 'aish minan 'ikën; min kamina me uniokin anua 'ikë ñukamaribi uniokën.
12 'Anan kamina aín tsipumi 'imainun aín rëbumi 'iti akamaribi unionan,
kamina aín bashikama Tabor 'imainun Hermón aribi 'akën, usa 'ikë ka anu tsókë unikaman mi rabi kuëënti 'ikën.
13 Min kushi ax ka chaiira 'ikën;
min mëkën mëkeu 'ikë ax ka kushiira 'ikën, usa 'ain kamina axa mimi nishkë unikama kupitanuma 'ati 'ain.
14 Min kamina achúshi 'apun 'akësokin upíira okin ñu 'ain;
usa 'ixun kamina min kushínbi kamabi ñu 'akin ënkinma nu nuibati 'ain.
15 'Ën 'Ibu Dios chuámarua ka uinu 'ikë unikaman kara mi rabiti 'unánxa an mi kuëënkin rabikë ax 'ikën.
'Ianan ka min bana 'ai, tirítan pëkakësa 'aish 'upitax bukukanti 'ikën,
16 usai 'ika min anë rabi ka nëtë kamabi kuëënkanti 'ikën,
usai 'ikin ka min kakësabiokin 'upiokin ñu 'akánti 'ikën.
17 Asérabi kamina mix an nu kushiokë a 'ain 'ianan kamina nu upí 'imin;
usakin 'imikëx nux kushiira 'ikë ax ka mix kuëënxun usakin nu 'imikë 'ikën.
18 ¡Dios ax ka aminu katamëkë manë pará okin 'akë usaribi 'ikën!
¡Usa 'aish ka nukaman 'apu 'ianan Israel unikaman 'apu 'aish upíira 'ikën!
19 Bërámabi kamina namámikësokin minmi kaískë
unikama abë banakin kakën:
'Ianan kamina ësairibi kiakën 'ën unikamanua kana achúshi uni rakuëma kaísun,
axa raíri unisama 'aish sinánñuira 'ikë 'akinti 'ai kiax kamina kiakën.
20 ¡'Ën kana 'ën uni 'iti David a kaisakën!
Usa 'ikë kana axa 'apu 'inun aín maxkánu xëni tutukakin anënun 'amiakën,
21 usa 'aish ka uínsaranbi 'ën 'akinkin ënkëma 'iti 'ikën.
Usa 'ikë kana 'ën kushínbi 'akinkë a ëntima 'ain,
22 usakin 'akinia ka axa ami nishkë unikaman 'akatsikixun sinánxun 'akinbi uisabi otima 'ikën,
'ianan ka 'atima ñu 'akë unikamanbi uisabi otima 'ikën.
23 'Ën kana amia nishkë unikama 'atima okin 'anun 'amiti 'ain;
'amikin kana ¡istëkënuxuma këñukin 'anun 'amiti 'ain!
¡Usakin 'akin kana amia nishkë unikama këñunun 'amiti 'ain!
24 Usa 'aish ka 'ën nuibakin 'akinkë ax uisaibi 'ikëma usabi 'iti 'ikën,
usai 'ia kana 'ën kushiira 'inun 'imiti 'ain.
25 Usakin 'ën 'akinkëxun ka
parúmpapa Mediterráneo kakë anuxunbi Éufrates kakë baka anubi sënë́onkin ax 'apu 'ixun ñu 'anun 'amiti 'ikën.
26 An ka 'ë kati 'ikën: Mix kamina 'ën papa 'ain;
'ianan kamina 'ën Dios an ië́mianan 'ë 'akinkë a 'ain.
27 'Ën kana unían aín bëchikë apan aín biti ñu a 'inánkësaribi okin 'inánkin,
axa kamabi menu 'ikë unikaman 'apu kamasamaira 'aish chaiira 'inun 'imiti 'ain.
28 'Ën a nuibakë ax ka usabi okin ënkinma 'ën nuibakë 'iti 'ikën,
'ianan ka 'ën abëtan achúshi ñu 'a axribi uínbi uisabi okëma anubi 'iti 'ikën.
29 Usa 'ain ka aín rëbúnkikama ax 'iásaribiti,
me 'imainun naí kamë 'ëo këñutisama pan 'ain 'apu 'iti 'ikën.
30 “'Aínbi kana atun bëchikëkama,
'ën 'unánmikë banakama kikësokin 'aíma 'ianan,
31 a 'aisama tani akamami 'ianan,
'ëx kia bana ax kikësaibi oi 'iti banakama kuaisama tania,
32 kana 'ën atux usai ñunshinakëkin,
ñu 'aisama 'akë a kupín atu i pëñan bixun unin aín bakë bëchikë 'akësaribi okin atu 'atima okin tëmëramiti 'ain;
33 'aínbi kana 'ën uni David nuibakin ëntima 'ain,
'ianan kana 'ëx kikësabiokin upíokin ñu 'axunkin a ëntima 'ain.
34 'Imainun kana uínsaranbi abëtan achúshi ñu 'akë,
kana 'aima kikínma 'ëx kikësabiokin asérabi 'akinti 'ain.
35 Achúshi okin kana 'ën asérabi 'ëx kikësabiokin 'axunuxun kakën,
usa 'ain kana paránkima David 'akinti 'ain:
36 usa 'ain ka aín rëbúnkikama ax 'iásaribiti atúxribi 'apu 'iti 'ikën,
usai 'ika bari 'ianan 'uxë këñutisama aín 'apu 'iti 'ikën.
37 ¡Usai 'ika 'uxë 'ikësaribiti anubi 'ianan!
¡Xënibua 'aínbi naíkamë 'ëo këñutisama 'ain 'iti 'ikën!”
38 Usa 'aínbi kamina, min kaískë 'apubi 'akinsama tankin;
¡usokin 'anan kamina ami nishkin 'aisama on!
39 Min kamina min kaísa unin rëbúnkikama 'apu 'ixunbi,
min kásabiokin 'aíma;
unin ain mañuti nipakëkësa 'itanun 'imian.
40 Kamabi anun aín ëmakama kënëara a kamaxa tukibuti kini kiniabu 'inun kamina;
¡usakin 'amia 'aish ka atun ëma kënëara ax 'aisama okan 'ikën, usa 'aish ka bëríbi usabi 'ikën!
41 Usokin 'akë 'ain ka au inúkin kamabi unin añu kara bisatania a iskin mëkamatia;
usokëbë ka a rapasu 'ikë unikamax atumi kuaia.
42 Min kamina ami nishkë unikama,
atun kuëënkësokin 'atankëxa bërí kananuna atu 'a kiax kuëënkin atun mëkën manámi oi 'inun 'imian.
43 Minbi kamina an tuinkë manë xëtokë axa xërui kuënuñuma 'inun 'imiakën,
axa ami nishkë unikaman abë 'akanankin 'akasmanun 'akinkinma ëankën.
44 Min kamina ax 'apu 'aíshbia kushiñumasa 'inun 'imikin;
axa 'apumasa 'aish menu pakëkësa 'itánun 'imian;
45 usakin 'imikin kamina 'itsama baritia 'imia tsónun aín baritia tëakën,
usakinmi 'akëx ka 'itsaira katëaxa.
46 'Ën 'Ibu Dios,
¿uínsaran ira kaina mixmi unë́kësa 'ikë a nëtë́ti 'ain?
¿'Ianan kara mix nishkë ax nëtë́tima, tsi rëkirukësa 'aish usabi 'iti 'ik?
47 'Ën 'Ibu Dios min kamina 'unánti 'ain anun tsótimi 'ë 'inánkë
ax ka anun basi tsótima 'itsama nëtë́ishi tsótimi 'ë 'inánkë 'ikën;
usa 'ain ka minmi unio unikama atúxribi 'itsama baritia sënëmishi tsotia.
48 ¡Uixi ka tsóti uínsaranbi bamaima 'ima!
¡Uixi ka bamatinuax ië́tima 'ikën!
49 'Ën 'Ibu Dios,
¿uinu kara minmi 'ën kana mi nuibati 'ai kixun a irapain,
ñuikin min David ká bana ax 'ik?
50 'Ën 'Ibu Dios min unikamami ka kamabi unix 'itsaira kuaia;
kuaikin ñuikankë a kana 'ën sinanin.
51 'Ën 'Ibu Dios, ¡ësokin ka axa mimi nishkë unikaman nu 'atima oia!
¡Usakin ka min kaískë uni 'ikëbi uisai kara 'ia abi ñuibiankin 'atima oia!
52 Dios ax ka chuámarua xënibua 'aínbi 'iti 'ikën.
¡Usai ka 'iti 'ikën!