Dios këñútimoi 'imainun ka unix 'itsama baritiashi tsóti 'ikë kikë bana
90
Nukën 'Ibu Dios mix kamina, bërámaira nun chaitiokëkama 'akian 'ixunbian bëríbi nu 'akinkë a 'ain.
2 Anun bashikama 'imainun me 'ianan ënë,
nëtëkama unitisama 'aínbi 'iá 'aish,
kamina ënë nëtëkamanbi bëríbi mix Dios aira 'ain.
3 Usa 'ain ka mixmi unix ka me putu 'akë 'aish
me 'itëkënun 'imin; usai ka unix ñui me 'itëkënia:
4 Asérabi ka mil baritia inúkë ax min tankëx
bënëtishi inuti 'inuónkë nëtë usaíshi 'ia.
¡Usai 'ikë ax ka uiti hora kara imë́ inutia usashi 'ikën!
5 Usa 'ixun ka baka kushin 'akësokin 'akëx,
unin tsóti ax 'uxnë́kënuax bënëtishi,
bësukë usashi 'ikën;
6 'ianan ka xubi pë́karakëma 'aínshi upíira 'inun
uatankëxia bari kuabúkëbë chushikë usaribi 'ikën.
7 Asérabi kamina mix nishkin nu rakuë́nun 'imianan,
¡bëtsi bëtsi okin sinani sinánkasmanun 'imin!
8 Min kamina nuxnu 'uchakëkama 'imainun 'atimakin ñu 'akë akamabi 'unanin,
usa 'ain kamina unin isiamabi nun ñu 'ati sinánkë abi 'unanin.
9 Asérabi ka nuxnu tsókë,
ax mixmi numi nishkëbëshi këñutia;
'ianan ka anun nux tsókë baritia ax munuma uin bitsi nun uinkë usaribi 'ikën.
10 Anun tsótimi nu 'inánkë ax ka setenta baritiashi 'ikën;
usa 'aínbi ka uix kara kushipain 'ikë ax kuni ochenta; baritia 'imi tsóti 'ikën,
'aínbi kananuna 'itsabaritia tëmërakin ñu mëi atsanin.
¡Usai ka nux 'ikësaribiti baritia kamax, bënëtishi inutia!
11 ¿Uin kara min kuëënkëma ñu 'aia isími mix nishkë a 'unánti 'ik?
¿Ui unin kara mix nishkë a 'unánti 'ik?
12 Min kamina nukama 'unánmiti 'ain uiti nëtë karanuna tsóti 'ai a upíokin tupunun,
usakin mi 'akëx kananuna nun sinan 'atima 'ima min sinánmikëxun upiokinshi ñu 'ati 'ain.
13 ¡Nun 'Ibu, nukamanu kamina utëkënti 'ain!
¿Uínsaran ira kaina nu 'akintëkënti 'ain?
¡Minmi kaisa min unikama ënë kamina nuibakin 'akinti 'ain!
14 Nu kamina min nuibakin nëtëkamabi 'imiti 'ain,
usai 'i kananuna mi rabi kuëëni kantai nux anun tsókë nëtëkaman 'iti 'ain.
15 Nukama kamina 'itsa baritia kuëëni tsónun 'imiti 'ain; nuxnu 'itsabaritia 'imi tëmërakësa usaribi okin.
16 ¡Min kamina min unikama 'imainun aín rëbúnki kaman
min 'akë ñukama isanan min kushikama isnun ismiti 'ain!
17 Nukën 'Ibu Dios min nu nuibakin 'akinkë ax ka nubëbi 'iti 'ikën.
¡Usa 'ain kamina nun ñu mëëkëkama upí iskin!
¡Abi nun ñu mëëtikama nu 'akinti 'ain!