Diosan ka bërúankin nu 'akinia kikë bana
91
Uix kara Dios kamabi kushiñuira 'ianan,manámi 'ikë an bërúankë an ka
2 ësokin a rabikin Dios kati 'ikën: “Mix kamina an 'ë bërúankin kushiokë a 'ain,
'ianan kamina nux ami katamëkë a 'ain, ¡usa 'ain kana 'ëx mimi katamëti 'ain!”
3 Usa 'ixun ka an ishi nun 'unánkëma 'atima ñu,
'imainun anun uni bamakë 'insín anuabi nu ië́miti 'ikën,
4 usakin 'anan ka anbi mi ñuina pëchiñusa 'ixun aín pëchin bërúankëx kamina uisaibi 'ima upí 'iti 'ain.
¡Usa 'ain ka an mi bërúankë ax manë parámi mix katamëkësa 'inun mi 'imiti 'ikën!
5 Usa 'ain kamina imë́ ñu 'aisama inutimi, rakuë́tima,
'ianan kamina nëtënbi pia nikian anun mi 'atimi rakuë́tima 'ain,
6 usai 'ianan kamina bëankibukëmi katamëaxa ukë ñu 'atimakama 'ianan,
nëtënribi an ñu 'atimoi nikë ñu kamamibi rakuë́tima 'ain;
7 usai 'ikëbëbi ka mil uni min mëmiu bamai këñuti 'ikën 'imainun ka
diez milribi min mëkeu ñui këñuti 'ikën, usai 'imainun kamina mix uisa ñubi 'inútima 'ain.
8 Usa 'ain kananuna nun bërúnbi:
uisai kara an ñu 'atima 'akë unikamax Diosan 'imikëx 'ia isti 'ain.
9 Mix kamina Dios an nu bërúankë a 'ain,
usa 'aish kamina Dios manámi 'ikë 'ain,
10 usa 'ain ka uisa ñu 'aisamabi minu utima 'ikën,
'ianan ka 'aisama 'insínbi min xubunu utima 'ikën;
11 an ka aín ángelkama
uinu karamina kuani anuabi mi bërúanun xuti 'ikën.
12 An ka mi aín mëkënan
maxáxmi tachakaxma 'inun mi bikin bërúanti 'ikën.
13 'Ianan kamina paru 'inúan 'imainun,
ñuinakan 'ëobu runu akama nëbëtsi nikëbi ka mi uisabi otima 'ikën.
14 “'Ën kana kamabi ñu 'aisamakama ië́miti 'ain,
an ka nuibanan 'ë 'inánxa usa 'ain.
15 Uínsaran kara 'akinun kixun 'ë kaia anun kana 'akinti 'ain;
¡'ëxbi kana abë 'iti 'ain!
Usakin 'ai kana 'ëx abëbi 'iti 'ain,
'ënbi kana 'upiokin kamina ñu 'a kixun mi kati 'ain;
16 'imikin kana 'itsa baritia tsotia kuëënun 'ënbi ië́mitankëxun 'imiti 'ain:
¡usakin 'akin kana 'ën ië́mikëxa kuëëni tsónun 'imiti 'ain!”