Nukën 'Ibu rabi kananuna kuëëni ami kantati 'ai kikë bana
95
Dios rabi ami kantai kuëënun ka ukan;an ka nu bërúanan ëñëmia ami kananuna kantati 'ain.
2 Usai 'i kuëëni kananuna a 'uramanuax 'ikësai kantai,
anun kantati ain bana 'akë anun kantai 'asabi ka kai kuëënti 'ain.
3 Ax ka Dios chaiira 'ikën,
usa 'aish ka bëtsi bëtsi dioskama atun 'apuira 'ikën.
4 Nukën 'Ibu Dios aín mëkënu ka kamabi me kuainakëa ax 'ikën;
ainan ka kamabi bashi ënënmenma kuainakëa axbi 'ikën.
5 'Ianan ka parúmpapa anbi 'á 'aish ainan 'ikën, 'imainun meribi ka ainan 'ikën;
¡anbi ka 'ain mëkënan 'akësokin ñukama uniokëxa!
6 Usa 'ain kananuna rantinpuruni 'ikin a rabiti ukanti 'ain;
a rabi kananuna Diosan ismainunbi rantinpuruni 'iti 'ain,
an ka nuribi uniokëxa.
7 Ax ka nun Dios 'ikën,
usa 'ain kananuna nukamax an kaískë unikama 'ain;
usa 'aish kananuna an 'arakakë ovejakamasa 'ain.
Usa 'ain kananuna bërí ax ësai kia kuati 'ain:
8 mitsun nuitu kamina Meribá kakë menuxun 'asaribiokin iruatima 'ain;
a nëtëkaman mi anu uni 'ikëma me Masá kakë anuxun 'akansaribi okin,
9 uínsaran kara min chaitiokëkama 'ën ñu 'aia iskinbi,
'ë tankatsi kixun 'akankëxa.
10 'Ëx kana cuarenta baritia 'imi 'itsaira atumi nishakën,
usai 'ikin kana a unikama 'atimati kananuna tsóti kixuan unánun 'unánmiakën;
¡usai 'ikin ka ax kikësabi oi 'iti 'ën bana a tankama 'ikën!
11 Usai 'ia atu isi nishi kana kiakën,
'ën kana a 'inánuxun atu ká me anu tsónuxa atsínun 'imitima 'ain.