Nukën 'Ibu ax ka 'apuira 'ikë ki ami kantati bana
(1 Cr 16.23-33)
96
Nukën 'Ibumi kantai kananuna achúshi kanta ió ami kantati 'ain;kamabi menu 'ikë unikama;
2 Diosmi kantakin kananuna ain anë upíokin sinánxunkin a rabiti 'ain;
usai 'ikin kananuna nëtë kamabi an ië́mikin nu 'akinkë a kamabi ñuikin rabiti 'ain.
3 Anan kananuna aín kushian unin iskëma ñu upíirabu 'a akamaribi kamina kamabi ëmanu 'ikë,
unikaman kuanun ñuixunti 'ain,
4 Nukën ibu ax ka chaiira 'ianan asérabi upíokin rabikë 'iti 'ikën:
¡ax ka bëtsi dios kamasamaira, ami rakuë́ti a 'ikën!
5 Bëtsi ëmanu 'ikë unikaman rabikë dioskama ax ka kushiñuma 'aish ñuumara 'ikën,
'aínbi ka anu rabikë Nukën ibu an kuni naíkamë 'ëokama uniokëxa.
6 ¡Anua ax 'ikë anu ka chaiira 'itánun upíokin pë́kakë 'ikën!
¡Anua 'ikë anu ka aín kushin 'ikë usa 'aish ka upíira kakë ax upíokin pë́kakë 'ikën!
7 Kamabi ëmanu 'ikë unikama Nukën 'Ibu Diosan aín kushin ñu 'akë,
akamina 'unánkanti 'ain, 'ianan kamina usakin aín kushin ñu 'akë aribi ñuikanti 'ain;
8 usa 'ain kamina anuxun a rabiti xubu 'ikënua me ëman mëníokë anu,
ami 'inainshiti ñukama buanxuni kuanxun rabiti 'ain,
9 anuxun kamina anua kata upíira 'ikë, anuxun Dios rabikanti 'ain.
¡Usakin 'akëbë ka kamabi menu 'ikë unikama ami rakuë́ti bërëti 'ikën!
10 Bëtsi bëtsi ëmanu 'ikë unikama kamina kati 'ain:
“¡Dios ax ka 'apuira 'ikën!”
Usa 'ixun ka ënë me shaíkisama okin uniokëxa;
an ka kamabi ëmanu 'ikë unikama bëtsi 'akësaribi okin sënë́nbi 'itánun 'akinia.
11 ¡Me 'imainun naíkamë 'ëo ax ka kuëënti 'ikën!
¡'Imainun ka parúmpapa bëchuni anua 'ikë ñukamabëbi banati 'ikën!
12 ¡Usai ka mekamaribi
anua 'ikë ñukamabëbi kuëëni kantati 'ikën!
¡'Ianan ka kuëëni ninu 'ikë ikama axribi sharati 'ikën,
13 usai 'ika Diosan 'ismainun kantati 'ikën!
¡Ax ukin ka ënë menu 'ikë 'apu 'ixun 'akinti 'ikën, 'akianan ka kamabi menu 'ikë ëmakamanu 'ikë unikamaribi 'akinkin asérabi an ñu upíokin 'ati 'ikën!