Nukën 'Ibu ka nun kushibëtanbi rabiti 'ikë kikë bana
103
'Ën kana Nukën 'Ibu Dios 'ën kushibëtanbi rabiti 'ain;'anan kana 'ën kushibëtanbi aín anë upíira a rabiti 'ain.
2 'Ën kana Nukën 'Ibu Dios 'ën kushibëtanbi rabiti 'ain;
usakin 'akin kana kamabi ñu 'ë 'akinkë a manukinma sinánti 'ain.
3 An ka 'ën 'atima ñu 'akëkama tërënxunkin 'ë mëníoxuanan,
kamabi 'ën 'insínkëkama 'ë pëxkuxunia,
4 an ka ñutisa 'ikëbi 'ë nuibairakin ië́mia,
ax nuibanairakë 'ixun kamabi ñu upíokin 'anun 'ë nuibatia,
5 'anan ka kamabi ñu upíbu 'ë 'inania
'ianan ka 'ë bënátëkëni tëtëkamë 'ëo ain rani rëukubutankëx amiribishi 'irutëkënkësa usairibi 'i 'ëx kushi 'inun 'ë 'imia.
6 Diosan ka asérabi upí ñu 'axunkin,
axa bëtsin 'atimokëx tëmërakë unikama 'akinia.
7 Usa 'ixun ka Moisés 'imainun Israel unikama
uisa ñu atu 'axunti kara kuëënia kixun 'unánmiakëxa.
8 Dios an ka nuibanairakë 'ixun;
bënëtishi nishkima munu ñu 'aia.
9 Usa 'ixun ka nukama kamabi nëtëinra usakin kamina ñu 'atima 'ai,
kixun nu kai numi xënibuti nishima, bënëtishi aín nishkë nëtë́tia;
10 usa 'ixun ka nukama 'atima ñu 'ai ami 'uchaiabi a sinánkin nu 'atimaira okin,
tëmëramiti 'ixunbi nu 'amá 'ikën;
11 'imainun ka uikaman kara ax kikësabiokin 'aia a unikama nuibakë ax chaiira 'ikën,
usa 'aish ka naí 'imainun mebëtan sënë́nsaira ax nuibanankë ax 'ikën.
12 'Ianan ka nux 'uchakëkamaribi; nunua 'uramikin,
bëtsibëa me kuainakëti 'urakë usaribi 'inun 'imiaxa.
13 Uikaman kara a nuibakin ax kikësabiokin 'aia,
a unikama ka Diosan unían aín bakë bëchikëkama 'akësaribi okin nuibatia;
14 usa 'ixun ka Diosan 'unánxa, añu 'á karanuna 'ai kixun:
an ka upíokin 'unania nux kananuna me putu 'akë 'ai kixun.
15 Unin tsóti ax ka xubi koibia chushikë usashi 'ikën;
'ianan ka ninu ro uá urukë iskë usaribi 'ikën:
16 usa 'ikëa suñun kushi bëkikin masókëx ka nëtë́tia usai 'iaka,
unin uisai kara 'iaxa kixun 'unanima.
17 'Aínbi ka Diosan unikama nuibakë ax usabi nëtë́tima oi 'ia,
uikaman kara ax kikësabiokin 'aia a unikama;
'ianan ka uin kara an kakësabiokin 'aia a nuibanan
aín rëbúnkikamaribi aín chaitikama 'asaribiokin bëríbi nuibatia,
18 'anan ka uikaman kara an achúshi ñu mënio ax kikësabiokin a bana
tankin 'anan ax kikësabi oi 'iti aín bana a manukima 'aia a unikama nuibatia.
19 Nukën 'Ibu Dios ax ka naíkamë 'ëo anu 'apuira 'ikën,
usa 'aish ka ax kamabi ñukaman 'ibuira 'ikën.
20 ¡Anu uxun ka aín ángel kushiirabu an Nukën 'Ibu Dios rabiti 'ikën!
Mitsun kamina an kakësabiokin 'anan,
uisakin ñu 'anun kara mitsu kaia usakin 'axunti 'ain.
21 ¡Anu uxun ka aín suntárukaman 'upiokin sinánkin Nukën 'Ibu Dios rabiti 'ikën,
ñu mëëxuanan an kuëënkësa okinshi 'axunti 'ikën!
22 ¡Anu uxun ka Nukën 'Ibu Dios kamabi ñu an unio 'ianan,
kamabi bëtsi menu 'ikë unikaman a rabiti 'ikën!
'Ën kana Nukën 'Ibu Dios 'upiokin sinánxunkin 'ën kushibëtanbi rabiti 'ain.