Nukën 'Ibu Dios an kamabi ñu unio a rabiti bana
104
¡'Ën 'Ibu Dios kana 'ën kushibëtanbi rabiti 'ain!¡Mix kamina chaiira 'ianan 'ën Dios 'ain!
Usa 'aish kamina min kushi chaba chaba kikë anun rabumëkësa 'ain;
2 'ianan kamina tirítan pëkakë chupan rabumëkësaira 'ain.
¡Min kamina chupa pëninkësa usa okinshi naí kamë 'ëo uniokën!
3 ¡Min kamina naínu 'ikë baka nëbëtsi anu min xubu 'ati ain itá nitsiankën!
Usakin 'anan kamina nëtë kuin aribi min caballonën nikinkë usaribi 'inun 'imia;
¡anun kuani kamina suñun pëchinu 'irukiani kuankësa kiani kuanin!
4 Usa 'ain ka suñukama axbi an min bana ñuikë 'ikën,
'imianan kamina kanákamë 'ëo mërirukë abi an mi ñu mëëxunti 'imiakën.
5 Min kamina me aín tapunmibi bikin uniokën,
anuaxa uínsaranbi shaíkitima okin.
6 Parúmpapa baka nëmin an ka me mapuakëxa,
achúshi chupan mapukësa 'inun.
'Imainun ka 'umpaxan kamabi ain bashikama mapukë 'iakëxa.
7 Usa 'ikëbi min munuma banakin kakëx ka, parúmpapa 'umpax ëskikiani amo rakarakëaxa;
usai ka bënëtishi mix kaná kamë 'ëo banakësai 'ikin kakëxun min bana kuatishi 'iakëxa.
8 Usai 'ika aín bashikama mapukë 'imainun me sapankama axribi ë́skibutanun,
anu sënën rakatimi sinánxunkë anubi rakarakëaxa,
9 usa 'ain kamina min uínsaranbi anuax,
me mapurutëkëni 'ëtëkënima anubi 'itiokin 'imiakën.
10 Min kamina xëxá 'umpaxkama aín bashinuax kuania,
baka chami xobuti saënun 'imin.
11 A 'umpax ka ñuina raëkëmakama an xëaia;
'amainun ka ninu 'ikë ñuinakama atúnribi shimaxun xëaia.
12 'Imainun ka a bakakama kuëbi axa nuánkë ñuina pëchiukaman atun na 'aia;
¡usakin 'atankëx ka i pëñankama aín xama manánuax tsótax banaia!
13 Min kamina mekama,
chabotanun mananuaxa, ui 'ibútanun 'imin;
usokëbë ka menu 'ikë ñukama chabáti upiti koia.
14 Usakin 'anan kamina ñuina kaman piti basi koonun 'imianan,
unin 'apáxun mëníokë ñukama aribi,
aín bimi piínua menuax tuatanun 'imin,
15 usakin 'aia ain bimi pi kushiirabu 'ianan ka
uvas baka xëai kuëëni,
ain bëmánan upí 'inun 'ikë ax xënin 'ikësamaira 'inun chábachábaki 'ia.
16 Nikama 'imainun ka Líbano menu 'ikë kunxankama,
Diosanbia unimia akamax 'umpaxan chabókë menu 'ikën.
17 A ikamanu ka ñuina pëchiñu chukúma an aín na 'aia,
'imainun ka pino kakë ikama ain pëñanu cigüeña kakë ñuina pëchiñu chabu akamaxribi 'ia.
18 Usai 'imainun ka aín bashi manankama anu cabra raëkëmakama ax bukuia,
'imainun ka mapara kininu marisa ñuina raëkëmakama ax unëtia.
19 Min kamina 'uxë an imë́ pëkakë a uínsaran kara 'uxëkama isitia akama 'unánti 'akën;
barin ka uínsaran kara xupibuti bë́ankiti 'ikë a 'unánxa.
20 Bari kuabuti xupibuti bëánkibukë ka
ninuax ñuinakama ax tsuákibutia.
21 'Imainun ka paru 'inúan aín piti ñuina bitankëx kuëëtia;
usai 'ikin ñukákëxun ka Diosan aín piti 'inania.
22 'Aínbi ka barin urukin pë́kabëtsinkëbë,
anua 'ikë aín kinikamanu rikiantankëx anu 'uxi rakabutia.
23 Usa 'ain ka unin xabakuatsinkëbë nirutankëxun,
aín ñu mëëti 'akin bari xupibuti kuabutamainun 'aia.
24 ¡Uiti ñukamaira kaina mix Dios 'ixun 'akën!
A ñukama kamina mix sinánñuira 'ixun 'akën;
¡usa 'ain ka kamabi menu min 'a ñukama 'ikën!
25 Anu ka parúmpapa naxbaira 'ianan ënën menma kuani bëchunkë ax 'ikën,
usa 'ain ka nun tupuntisamaira ñuina chabu 'imainun chukúmaratsubu axbi anu 'ia;
26 anun ka manë nunti chaiirabu ax kuania,
'imainun ka bëtsi ñuinakan 'ëo min unio akamaxribi anu 'ia,
abë ka anu 'ikë ñuinakama atux kuaia.
27 A ñuinakamax ka min kakësoishi 'ia,
usa 'ain ka a ñuinakaman anunmi aín piti nëtë 'ikëbëtan piti 'inánti ashi kainia.
28 Usai 'ikin ka min 'inánkëxun atun piti;
mëkënan 'akësokin bixun piti upíirabu a puchákin pia;
29 'ianan ka mixmi ami kasuakëkëbë rakuëtan bamai,
'ianan minmi anun uinti 'inankëmax bamai amiribishi me putu 'itëkënia.
30 'Aínbi ka minmi anun uinti suñu 'inan,
'aínbi kamina minmi unio ñukama raíri këñukiantamainun, axa bërí unikëkama aribi anúan uinti suñu 'inanin.
31 ¡Usa 'ain ka Nukën 'Ibun kushi ax uínsaranbi këñutima 'ikën!
¡Nukën 'Ibu ax ka an unio ñukama a isi 'itsaira kuëënia!
32 An iskëx ka mekama bërëi shaíkia;
'imainun ka aín bashikamanuax an mëëkëx 'ikësa 'inun kuin niruia.
33 'Ëx tsókëpan 'aish kana; anun kantati akë anun 'ën 'Ibu Diosmi kantati 'ain.
34 'Ën kana Nukën 'Ibu 'ën sinanën asabika kain;
usa 'ain ka Dios an ishi 'ë kuëënun 'imia.
35 ¡'Uchañu unikama ax ka
ënë menuax nëtë́ti këñuti 'ikën!
¡Usaia atux 'imainun ka an 'atima ñu 'akë unikama atúxribi 'aíma 'inun këñuti 'ikën!
¡Usa 'ain kana Nukën 'Ibumi upíokin sinani 'ën kushibëbi kantati 'ain!
¡Ësokin kananuna Dios rabiti 'ain! ¡Usa ka 'iti 'ikën!