Diosan Israel unikama 'akian 'ikë ñuikë bana
(1 Cr 16.8-22)
105
Nukën 'Ibu Dios kananuna aín anë ñuikin rabiti 'ain;usa 'ain kamina kamabi ëmanu 'ikë unikama an 'akë ñukama ñuixunti 'ain.
2 Anun kantakin kamina rabiti 'ain.
¡'Imainun kamina an ñu chabu 'a akama ñuikanti 'ain!
3 Aín anë upíira a sinani kananuna rabikanti 'ain.
¡Bëtsi Dios nun rabikë usaribi ka 'aíma 'ikën,
usa 'ain ka aín nuitu upitani an Dios rabikë unikama kuëënti 'ikën!
4 Nukën 'Ibu Dios kamina ax kushiira 'ikë barikanti 'ain;
usakin 'akin kamina kamabi nëtën Dios barikanti 'ain.
5 'Imainun kamina an ñu chabu 'a a
'ianan aín bana sinánti 'ain;
6 mitsux kamina aín uni Abraham aín rëbúnkikama 'ianan,
Jacob an kaisa aín bakë bëchikëkama 'ain, usa 'ixun kamina 'ëx kia kuati 'ain.
7 Ax ka nun 'Ibu 'ianan nun Dios a 'ikën;
¡Usa 'ikë ka kamabi menuxun aín bana 'unánxa!
8 Usa 'ixun ka uiti baribi kara inúa 'aínbi,
axa usakin ñu 'akatsikikin achúshi ñu mënio 'a banakama a manutima 'ikën,
9 'ianan ka usakin ñu 'axunuxun achúshi ñu mëníokinun Abraham kakin abëtan 'a 'ixun,
Isaac asérabi katëkënxuma ashikin kakëxa,
10 'imainun ka a tanti bana a Jacob 'axuankëxa,
'axuanan ka uínsaranbi a manutima okin achúshi ñu mëníokin Israelkama 'axuankëxa,
11 usa 'ain ka ësai kiakëxa:
'Ën kana Canaán kakë me bëtsinanpan 'iá 'aísha ainan 'itánun 'inánti 'ai kiakëxa.
12 Atux ka 'itsama unishi 'iakëxa
usa 'aish ka bëtsi menu 'ikë 'aish kuainbëkinishi nikë 'iakëxa,
13 usa 'aish ka bëtsi menu 'itankëx bëtsi menuribi 'ianan,
bëtsi ëmanu 'itankëx bëtsi ëmanuribi kuani niakëxa,
14 Usai 'ikëbëtan ka uínbi atu ubionun Diosan 'amiama 'ikën
'ianan ka 'apukamanribia uisabi atu oxuma 'anun 'amiama 'ikën:
15 'Ën kaískë unikama 'atima oxuma 'anan kamina
an bana ñuikë 'ën unikamaribi uisabi otima 'ai kixun ka 'apukama kakëxa.
16 'Ianan ka, a menua numi chaiira 'inun,
'imikin atun piti ñu 'aíma 'inun 'imiakëxa.
17 'Aínbi ka Diosanbi an atu 'akinun José,
aín xukë́nkama ami nishkin marua 'ixunbia atu 'akinun 'imiakëxa.
18 Egiptonu 'ikë unikaman ka tëmëramikin manë risin tëkërëkaxun;
sipunu 'inun 'imiakëxa.
19 Axa kia nëtë́a sënë́ntamainun ka Diosan José usakin pain tëmëramiakëxa,
usakin 'axun ka a nëtë sënë́nkëbëtan asérabika 'ëx usai kia bana sënë́anxa kixuan 'unánun 'unánmiakëxa.
20 Usai 'ikëbëtan ka kamabi ëmakamanu 'ikë unikaman 'apu,
an José sipunua chikínun aín unikama 'amiakëxa;
21 usakin 'axun ka, kamabi unikaman 'apu 'inun 'imianan,
an kamabi aín xubunu 'ikë ñukamaribi isti anëakëxa,
22 usakin 'akëxun ka an 'apu 'akinkë 'imainun aín unikama aturibi usaía sinánñuira 'iti banakama aribi 'unánmiakëxa.
23 Usai anu 'ia ka Diosan Jacob, 'ikëbi Israel kakë ax,
bëtsi menuax Egipto menua 'ikë Cam kakë me anu tsóti kuakëxa.
24 Usai 'ia ka Diosan 'aisamaira 'ia 'uakamë 'ëonun an kaískë unikama 'imiakëxa,
usakin 'imikin ka egipcio unikamasamaira 'ia kushiirabu 'inun 'imiakëxa.
25 Usa 'aínbi ka egipcio unikaman
Diosanbi atumi nishkian ain unikama 'atima onun kixun sinánmiakëxa,
usokëxun ka Diosan kaískë unikama a atumi nishkin bëtsi bëtsi okëxa.
26 Usa 'ain ka Diosan aín uni Moisés,
'imainun Aarón an 'akintia kaískë uni a xuakëxa,
27 atun ka Diosan 'amikëxun anu uni 'ikëma me anuxun:
¡unin isáma ñu chaiirabu Egipto me Cam kakë anuxun 'akëxa!
28 'Akin ka Diosan bëánkibukë chaiira an anu 'ibúkin a me mapunun 'amiakëxa
usakin 'akëbëtanbi ka egipcio unikaman atun kakëxun aín bana kuaisama tankëxa.
29 Usakin 'anan ka anua 'ikë baka kamanua 'ikë 'umpaxkamaribi imi 'ikëbëa,
bakanu 'ikë ñukama këñunun 'imiakëxa;
30 'imianan ka 'aisamaira 'ashá kamabi Egipto menu uninun 'imiakëxa, usakin 'imikëx ka 'apun xubu 'ukëmëu anua 'uxkë anubi 'ashá atsíankëxa.
31 Usakin 'imiax ka Dios kiakëxa chipë 'imainun sëbë ka uniti 'ikën kikëbëa,
nëtë kuin tunankuatsini ukësa usaribi kuatsini ukin egipcio unikaman me tsitsirunun 'imiakëxa.
32 'Imainun ka Diosan 'uñe 'ibúnun 'imikinma, matsin tita bëruñu 'ibúnun 'imianan ka,
mëríru mëriruia tsi ëxku iskësai kaná a menu 'ibúnun 'imiakëxa.
33 Usai 'ikin ka uvas 'apákëkama 'imainun higuera 'apakëkamaribi këñuakëxa;
¡'anan ka Egipto menu 'ikë i kamaribi masókëxa!
34 Usakin 'anun 'amitankëxa Dios kikëbë ka 'aisamaira champu uakëxa;
¡usa 'aish ka nun tupun tupun kaisamaira 'iakëxa!
35 ¡Usa 'ixun ka a champukama kamabi ninu 'ikë i pëchikama këñukin pianan,
kamabi menu atun ñu 'apákë akamaribi këñukin aín pëi piakëxa!
36 ¡Usakin pain 'amitankëxun ka Egipto menubi 'ikë,
unikaman rëkuë́n bakë bëchikëkamaribi këñunun 'imiakëxa!
37 Usakin pain 'atankëxun ka Diosan ain unikama kuri 'imainun manë uxua buania chikinun 'imiakëxa,
usakin 'imikëx kuani ka uinu 'ikë ñaká achúshinu 'ikë unixi tsiankianima kuankëxa.
38 Kuania atu isi ka egipcio unikama kuëënkankëxa,
amira atux rakuëkankëxia Israel unikamax kuania isi ka kuëënkankëxa.
39 Diosan ka a isbiania kuanti nëtë kuin atu manámi 'imianan,
tsi rëkirukësa 'ixuan pë́kakëbë imë́ kuankanti aribi 'imiakëxa.
40 'Ianan ka atun pitia ñukákëxun 'umpanxonëmë 'ëo këñun,
naínu 'ikë piti aribi 'inánkëxa 'inánkëxun pi ka pananima puchacëshi 'ikankëxa.
41 'Imainun ka mapara panarabëkëbë anuax 'umpax chikíakëxa chikiti ka anu uni 'ikëma
memi ki baka rarasa 'inun 'umpax rakakëxa.
42 Usakin 'akin ka Diosan uínsaranbi manukinma usakin ñu upí 'axunuxua,
aín uni Abraham ka a sinánkëxa.
43 Usakin 'akian Diosan chikinkëx ka aín unikama,
munuma kuëëni sharákin rabibiani chikikankëxa,
44 'imainun ka bëtsi menu 'ikë unikaman me atu 'inánan,
atun ñu 'apákë akamaribia binun 'inánkëxa,
45 usakin 'akëxuan a tanti banakama 'imainun,
an 'unánmikë banakama kikësabiokin 'anun ka usakin 'akëxa.
¡Usa 'ain kananuna ashi rabiti 'ain!