Nukën 'Ibun aín unikama tëmëraia ënkinma 'akinkë bana
107
Nun 'Ibu kananuna axa upí 'ikë asábi ka kakin rabiti 'ain,usa 'ain ka ax këñutima oi nuibanania.
2 'Ianan ka an ië́mikë unikaman Dios kati 'ikën,
an ka ami nishkë unikaman 'ati 'ikëbi ië́miakëxa,
3 usa 'ain ka atu bëtsi mekamanu 'iabia timëkin,
aín tsipumia 'anan aín rëbumi 'ikë akama 'ianan,
amiaxa bari urukë 'imainun, amia bari kuabúkë amiaxa timë́nun 'imiakëxa.
4 Nun xutakamax ka me 'unánxma bënuax 'ikësai anu uni 'ikëma masiñu me anun nikinbi,
anun ëma achúshi anu tsónux kuanti bai mëraimabi niakëxa;
5 usai nitsi ka pananx nianan 'umpax a xëati 'aíma 'ain shimax,
nitsi bamatisa tankankëxa
6 Usa 'i bënë́kin ka Dios ñukákankëxa,
ñukákëxun ka usai 'ia bënë́kë a upí tani kuëëntanun atu 'akiankëxa.
7 Usokin pain 'atankëxun ka bai
puntë ëma achúshi anu tsóti kuanti a mëramiakëxa.
8 Usa aín kananuna Nukën 'Ibu Dios nu 'akinkëxun asabika kakin rabiti 'ain,
¡an ka kamabi unikama upíokin ñu 'anun 'akinia!
9 An ka axa shiman bamatisa tankë unikama 'umpax xëanun 'inania 'inánan ka
ax numin bamatisa unikama aribi aín piti 'itsaira 'inania.
10 Nun chaitiokëkamax ka bëánkibukënu sipuakë 'ianan manë risin tëkërëkakë 'aish,
masá nuitukinbi añu kara 'ati 'ikë 'unánan uinu kara kuanti 'ikë kixunbi 'unánma 'ikën,
11 usai ka Diosan kakëxun kuaisama tankë kupín 'iakëxa,
usai ka Dios manámi 'ikë an kakësokin 'aisama tani atux 'iakëxa.
12 Usai 'ia ka Diosan tëmërakin ñu mëënun 'imikëxun ñu chaiirabu 'ai;
tatíki chakátiabi ka uínbi 'akianma 'ikën.
13 Usai 'i bënë́kin ka Dios an 'akinun ñukákankëxa,
ñukákëxun ka usai 'ia bënë́kë a upí tani kuëëtanun atu 'akiankëxa;
14 'akinkin ka bë́anbëan kikësanu 'ikëbi chikíanan
manë risin tëkërëkakësa 'inua atux tëmërakë anua chikíankëxa.
15 Usa 'ain kananuna Nukën 'Ibu Dios nu 'akinkëxun asabika kakin rabiti 'ain,
¡an ka kamabi unikama 'upiokin ñu 'anun 'akinia!
16 ¡An ka anu uni xëpúkë a xëkuëkama tukibunun 'imianan!
¡Anun xëputi bëarati nankë manëkama aribi tëkëbunun 'imiakëxa!
17 Usa 'ain ka nun xutakama 'itsaira 'insíni tëmërai,
atun bana kuakinma 'atima ñu 'ai 'uchakë kupínbi usai 'ikankëxa,
18 uisa pitibi pisama tani ka ami kuínsakëxa;
¡usai 'ikë anunbi ñuti 'uramashi 'iakëxa!
19 Usai 'i bënë́kin ka Dios an 'akinun ñukákankëxa,
ñukákëxun ka usai 'ia bënë́kë a; upí tania kuëëntanun atu 'akiankëxa.
20 Usakin 'akin ka aín banáinshi ñutisa 'ikëbi pëxkútanun atu 'imiakëxa;
21 usa 'ain kananuna Nukën 'Ibu Dios nu 'akinkëxun asábi ka kakin rabiti 'ain,
¡an ka kamabi unikama upíokin ñu 'anun 'akinia!
22 Usa 'ain ka ñuina 'axun xaroxuni an 'a ñukama,
a sinani kuëënkin rabikanti 'ikën.
23 Nun chaitiokëkamax ka nunti chaiira marutankëx anun ain ñu marui parúmpapa bakan kuani niakëxa.
Nitsi ka bëtsi ëmakamanu kuani niakëxa,
24 usai nikin ka parúmpapanuxunbi,
Diosan unio ñu 'upíirabu a iskankëxa.
25 Usa 'ain ka Dios kiakëxa suñúan kushiira bëkikin ka
chaiirabu 'inun ain bëchun tukinun parúmpapa 'umpax 'imiakëxa;
26 usakin 'amikëxa naíbëtan sënën nirukin anu 'ikë unikama këñunbi;
nunti chaiira parúmpapa bëchunan biruia tani ka atun upíokin sinánkë a nëtë́ti ratúkankëxa.
27 Usai 'ika ñu paë xëax paëanxa uni 'ikësai anu 'ikë unikama;
¡manë nuntinu 'ikë uni 'ikëmasa 'inun rakuë́tan bamai 'ikankëxa!
28 Usai bënë́kin ka Dios an 'akinun ñukákankëxa,
ñukákëxun ka usai bënë́kë a upí tani kuëëntanun atu 'akiankëxa;
29 usakin 'anan ka suñu kushiira 'ikuatsinkëbëa parúmpapa bëchunkë
aribi bukubunun 'imiakëxa.
30 Usakin 'akëbëa bëchun bukubutia isi kuëënkania ka
Diosan uinu 'ikë butunnu kuanti kara sinania anubi buánkëxa.
31 Usa 'ain kananuna Nun 'Ibu Dios nu 'akinun asábi ka kakin rabiti 'ain,
an ka kamabi uni ñu 'upiokin 'anun 'akinia.
32 ¡Kamabi unin ka timë́xun rabiti 'ikën!
¡'Amainun ka kamabi 'apukamanribi timë́xun rabikanti 'ikën!
33 Nukën 'Ibun ka bakakama 'imainun xëxákama anu uni 'ikëma
mesa 'ia ñankáishi ëski me rakátanun 'imia;
34 'imianan ka mekama aribi anu ñu 'apátisama 'itánun;
anu 'ikë unikamaxa ñu 'atima 'ai 'uchakë kupín 'imia;
35 usokin 'anan ka anu uni 'ikëma me akamaribi 'umpax anu
'inun 'imianan me anu 'umpax 'ikëmakama anua xëxá 'umpax upíbu 'inun 'imia;
36 anu ka axa panani tsóa unikama ëankëxa,
ënkëxun ka atun ëma chaiirabu 'inun anu 'akankëxa.
37 'Anan ka atun naënu uvas 'apáxun,
'aisamaira 'itánun tuaia bikankëxa.
38 Usakin 'aia ka Diosanbi bakë bëchipatia kaínu 'imianan atun 'arakakë
ñuinakamaribi 'aisamaira kaínun 'imiakëxa.
39 Usakin 'akinkëxa upiti tsótiabi ka amiribishi axa atumi nishkë unikaman 'itsaira,
tëmëramikin usakin 'akëxa 'akëx ka 'itsama uniratsushi bërúakëxa.
40 'Aínbi ka Diosan an bëtsi tëmëramikë unikama a timakin anu uni 'ikëma menuaxa,
ain bai nëtë́miax sinánkamanun 'imiakëxa.
41 Diosan ka uni ñuñukama a 'atimakin sinani masá nuitutiabi kuëënun 'imia;
¡'imikin ka atun 'arakakë ñuinakama 'ikësaribitia bëchipati ñuina 'arakakë 'ikësai aín aintsikamabë 'inun 'imia!
42 Usakin 'aia isi ka uni upí sinánñukama ax kuëënia,
usai 'ia isi ka 'atima sinánñu unikama ax uisa bananbi kima tsotia.
43 Uix kara sinánñu 'ikë an kuni ka ënë bana kikësokin 'ati 'ikën,
'akin ka Diosan ka kamabi uni nuibatia kixun unánti 'ikën.