Nukën 'Ibun ka an kaískë 'apu kushiokin 'akinia kikë bana
110
Nukën 'Ibu Diosan ka 'ën 'Ibu kaxa:'Ën axa mimi nishkë unikama minan 'imimainun kamina 'ë mëkeu tsóti 'ain.
2 Nukën 'Ibun ka Jerusalénnuxunbi, axa mimi nishkë unikama.
¡Mix 'apu 'ixun min ira 'anun mi 'amiaxa!
3 Min unikamax ka a nëtënmi 'akanankin kupitanuma 'akë a nëtën minu rikuatsinti 'ikën.
Diosan bashi upí kakë anu ka atuxi kuanti 'ikën,
usa 'ain kamina nëtë upíira urukian barin nibí ëskakë,
usaribi mix kamabi nëtën 'iti 'ain.
4 Nukën 'Ibux ka sinanatëkëntima oi kiaxa,
usa 'ain ka kana 'aima kikínma asérabi kana 'ati 'ai kiaxa,
Mix kamina sacerdote xënibua 'aínbi 'iti 'ain,
Melquisedec 'iásaribiti 'iti 'ain.
5 Nukën 'Ibu an ka min mëkeu 'ixun mi 'akinti 'ikën;
usa 'ixun ka anúan atu 'atima oti nëtë 'ikëbëtan atumi nishkin 'apukama 'atima oti 'ikën;
6 usokin 'akin ka bëtsi bëtsi ëmakama uisakin kara 'aisa tania usokin 'ati 'ikën;
usakin 'akëx ka kamabi menu uni bamakë aín maxkákama;
¡bënshinkë 'iti 'ikën!
7 Usa 'ain ka bainu 'ikë xëxá 'umpax 'apu an xëati 'ikën,
xëakëxun ka 'umpax an kushinun 'imitëkënti 'ikën.