Nukën 'Ibu Dios naínu 'ikë an ka 'ashi rabikin bëtsi ñu rabiti kuëënima kikë bana
115
Nukën 'Ibu Dios nukamax kananuna rabikë 'itima 'ain min anëx kuni ka rabikë 'iti 'ikën,usa 'ain kananuna nux rabikë 'itima 'ain;
¡Mix kamina nuibanankëira 'ianan asérabi min ñu 'akë a kupín rabikë 'iti 'ain!
2 ¿Uisa kupín kara numi kuaikin ñu 'atima 'akë unikaman
uinu kara nun Dios 'ikë kixun nu ñukáti ik?
3 Nun 'Ibu Dios ax ka naínu 'ikën;
usa 'ixun ka añu kara 'aisa tania akamabi 'akëxa.
4 An Diosan bana kuakëma unikaman rabikë ñukama ax ka
kuri 'imainun manë uxua usakin 'ati sinánxua,
unínbi aín mëkënan uniokë 'ikën:
5 Usa 'aish ka kuëbíñu, 'aishi banaima 'ianan;
bëruñu 'ixunbi isima;
6 'ianan ka pabiñu 'ixunbi, bana kuatima;
'ianan ka rëkinñu 'ixunbi anun ñu xëtima;
7 'ianan ka mëkënñu 'ixunbi anun añu ñubi mëima;
'ianan ka taëñu 'aíshbi anun nitsima;
¡usa 'aish ka achúshi banarabi aín tërunuax chikítima!
8 Usaribi ka an a ñukama uniokëma a 'imainun
an a ñukama rabikë unikama ax 'ikën.
9 Israel unikama, ¡mitsux kamina Diosmi katamëti 'ain!
An ka 'akianan nu bërúaia.
10 Sacerdotekama, ¡mitsúxribi kamina Diosmi katamëti 'ain!
An ka nu 'akianan bërúaia.
11 Mitsux Dios rabikë 'ixun kamina,
¡ami katamëkin ashi rabiti 'ain!
An ka nu 'akianan kamabi uniribi bërúaia.
12 ¡Diosan ka numi sinánkin nukama
upíokin sinánxunti 'ikën!
'Ianan ka Israel unikamaribi upíokin sinánxuanan,
sacerdotekamaribi upíokin sinánxukin ka
13 an a rabikë unikamaribi uisa uni kara 'ikëbi,
kushi uni 'imainun kushima uni akama upíokin sinánxunti 'ikën.
14 ¡Usa 'ain ka kuëënun Diosan mitsu 'imainun mitsun bakë bëchikënën,
rëbúnkikama 'aisamaira 'inun kaínun 'imiti 'ikën!
15 ¡'Ën kana kuëënin Dios an me, 'imainun naí kamë 'ëo unio an ka
upíokin sinánxunkin mitsu 'akinti 'ikën!
16 Naí kamë 'ëo ax ka Nukën 'Ibunan 'ikën, 'imainun ka
uni ainan 'inun me 'inánkëxa.
17 Axa ñukë unikaman ka Dios rabikasmati 'ikën,
anua atux 'ikë anuax ka uíxbi banaima;
18 usa 'aínbi kananuna ñukëma pain 'ixun nukaman kuni,
xënibua 'aínbi bëríbi Dios rabiti 'ain
¡Usa 'ain ka axëshi rabikë 'iti 'ikën!